Фотоколлаж: ©Tengrinews.kz
Қаржы министрлігі Мемлекеттік қызметкерлерді қысқарту, сондай-ақ бюджет шығындарын оңтайландыру арқылы қанша ақша үнемдей алғанын айтты, - деп хабарлайды Tengrinews.kz сайты.
Журналистер министр Ерұлан Жамаубаевтан Қаржы министрлігінде қанша мемлекеттік қызметші қысқартылғанын сұрады.
"Мен 2019 жылы жауапты хатшы болып келгенде, Қаржы министрлігінің қызметкер саны шамамен 19 800 адам болды. Қазір шамамен 15 мың. Айырмашылықты көріп тұрсыз ба? Айтарлықтай оңтайландырдық, қысқарттық. Біз әрқашан флагман болуымыз керек, сондықтан біз жыл сайын шығынды оңтайландырамыз. Жалпы мемлекеттік қызметкерлер санына келетін болсақ, бұл маған байланысты емес. Нақты көрсеткіш есімде жоқ, бірақ егер бес жылдық кезеңді алсақ, онда маңызды оңтайландыру болды деп ойлаймын", - деді шенеунік.
Жамаубаевтың айтуынша, алғашқы жылдары ғана министрлік шамамен 50 миллиард теңге үнемдеген.
"Былтыр үш жаңа облыс пайда болғандықтан, Қазақстан халқының саны да өсіп жатыр. Біз мұнда, бір жағынан, оңтайландыруды жақтаймыз, екінші жағынан, олардың мазмұнына қажеттілік бар. Бұл мәселеде тепе-теңдікті сақтаймыз. Тек биыл ғана біз 380 миллиард теңге сомасына бюджет шығыстарын оңтайландырдық. Бұл - имидж, автокөлік сатып алу, ғимараттарды күтіп ұстау секілді қажетсіз шығындар", - деді ол.
Журналистер Ұлттық экономика министрі Әлібек Қуантыровқа да осындай сұрақ қойды. Оның айтуынша, министрлік мемлекеттік қызметшілердің шамамен 15 пайызын қысқартты. Алайда шенеунік үнемделген қаражат сомасын атаудан бас тартты.
596 рет оқылды
