70-інші Канн кинофестивалінде (Франция) отандық киноиндустрия тарихында алғаш рет Қазақстанның ұлттық павильоны ашылды.
Алғашқы қазақстандық павильон фестиваль сарайындағы Le Village International кино нарығы алаңында орналасты. Фестивальға қазақстандық делегация қатысады, деп хабарлайды ҚР АКМ баспасөз қызметі.
ҚР Мәдениет және спорт министрлігі мен «Еуразия» халықаралық кинофестивалі ұйымдастыру комитетінің қолдауымен ашылған павильон жаңа фильмдер мен жобаларды дамыту мақсатындағы кәсіби кездесулер мен келіссөздерге жол ашады.
Белгілі халықаралық кинофестивальде қазақстандық павильонның ашылуы кино шығарушы ел ретіндегі еліміздің беделін арттырып, киноиндустрия саласындағы әріптестік мүмкіндіктер мен ынтымақтастық байланыстарды кеңейтеді.
Отандық павильон бағдарламасында қамтылған 2017 жылғы 22-28 шілде аралығында Астана қаласында ЭКСПО-2017 көрмесіндегі «Болашақтың энергиясы» бағдарламасы аясында ҚР Мәдениет және спорт министрлігінің тапсырысы бойынша өткізілетін Халықаралық «Еуразия» кинофестивалі тұсаукесерінің маңызы зор.
19 мамыр күні Францияның ұлттық кинематография орталығында ҚР мәдениет және спорт вице-министрі Асқар Баталовтың қатысуымен Қазақстанның ұлттық павильонының ашылуына байланысты ресми қабылдау өтеді. Сонымен қатар, концерт ұйымдастырылып, онда Өнер университетіндегі камералық ішекті ансамбльінің сүйемелдеуімен Айман Мұсақожаева және Димаш Құдайбергенов өнер көрсетеді.
Павильон жұмысы ұлттық фильмдерді қаржыландыру және тәжірибе алмасуға, қазақстандық киноиндустрия және туризм саласын дамытуға ықпалды әріптестер тартуға мүмкіндік жасайды.
3431 рет оқылды
