09 қаң, 2025 сағат 15:24

Қазақстандағы ипотека: 2025 жылға арналған жаңа талаптар мен мүмкіндіктер

Фото: Pexels.com

Күні кеше Олжас Бектенов жұмысшы кадрлар үшін ипотекалық және жалға берілетін тұрғын үйдің жеңілдетілген бағдарламаларын іске қосу мәселелерін пысықтауды тапсырды. Бұл қандай бағдарлама болатыны, шарттары мен іске қосылатын уақыты әлі белгісіз. Өз кезегінде «Отбасы банк» Қазақстанда қарапайым жұмысшыларға арналған жеңілдетілген ипотекалық бағдарлама барын мәлімдеді.

Банктың хабарлауынша, жұмысшыларды әлеуметтік қолдауға бағытталған «Корпоративті өнім» деп аталатын бағдарлама бар көрінеді. Бағдарлама аясында зауыт жұмысшылары, энергетиктер, кеншілер, металлургтер, мұнайшылар мен дәрігерлер, жалпы алғанда 1000-ға жуық адам баспаналы болған.

Бағдарлама пысықталып жатқанда, Ult.kz қазіргі ипотека нарығында жұмыс істеп тұрған бағдарламаларға шолу жасады.

«НАУРЫЗ»

Жаңа жылдан бастап бұл бағдарламаға бірқатар өзгерістер енді. Басты жаңалық — бастапқы жарна 20%-дан 10%-ға дейін түсті. Енді пәтер ақысының 10%-ын құйып, ипотека рәсімдеу мүмкіндігі бар. Ал екінші жаңалық – енді жобаға қатысу үшін депозитте кемінде 2 млн теңге болуы қажет. Бұған дейінгі талап бойынша 1 млн теңге еді.

Шарттары:

Мөлшерлемесі: халықтың әлеуметтік осал топтары үшін – 7%. Ал өзге тұрғын үйге мұқтаж ретінде есепте тұрған азаматтарға – 9%;
Берілетін қарыздың ең жоғары мөлшері: Астана, Алматыда 36 млн теңге, басқа өңірлерде 30 млн теңгеге дейін;
Бастапқы жарна: қарыз сомасының 10%-нан бастап;
Несиелеу мерзімі: 19 жылға дейін.

7-20-25

1 қаңтардан бастап бұл бағдарламаға да жаңа талаптар енгізілді. Сатып алушының (жұбайының да) Қазақстан аумағында меншігінде соңғы 18 айда баспана болмауы керек. Бірақ бұл санатқа апатты жағдайда тұрған, аумағы 15 шаршы метрден аспайтын 1 бөлмелі жатақхана сияқты баспаналар кірмейді.

Осы бағдарламамен кредит рәсімдеген әскери мамандарға да белгілі бір деңгейде жеңілдік беріледі. Яғни мерзімді әскери қызметте жүрген клиент негізгі қарызы мен пайыздарын өтеу мерзімін кейінге қалдыра алады. Ондай мүмкіндік әскери мерзім аяқталған соң да 60 күнге дейін сақталады.

Сондай-ақ бұл бағдарламамен тек жаңа, бірақ пайдалануға берілген тұрғын үй алуға болатынын ескерген жөн.

Шарттары:

Мөлшерлемесі: 7%;
Бастапқы жарна: пәтер құнының 20%-ынан бастап;
Несие мерзімі: 25 жылға дейін;
Тұрғын үйдің максималды құны: Астана, Алматы және қала маңындағы аудандар, Ақтау, Атырау, Шымкент — 25 млн теңге; Қарағанды, Түркістан — 20 млн; басқа аймақтар — 15 млн.

«ҰМАЙ»

Ресми табысы бар жұмыс істейтін әйелдерге арналған «Ұмай» ипотекалық бағдарламасы биыл қайта іске қосылды. Алайда бағдарламаға қатысу талабы өзгерді. Енді кірістің максималды сомасы – 900 000 теңгеден астам. Бұл бағдарламамен 50 млн теңгеге дейін қарыз алуға болады. Ол қарызды үй алуға да, жөндеу жұмыстарына да пайдалану мүмкіндігі бар. Сондай-ақ заемдар жаңа үйлер мен қайталама нарықтан тұрғын үй сатып алуға да беріледі. Соның ішінде баспананы үлестік қатысу шарты бойынша да алуға болады.

Шарттары:

Мөлшерлемесі: 14,4% (жылдық тиімді сыйақы мөлшерлемесі 15,4% бастап), кейін 3,5%-5% дейін төмендейді (ЖТСМ 3,6% бастап);
Берілетін қарыздың ең жоғары мөлшері: 30 млн теңгеге дейін;
Бастапқы жарна: 20%-дан бастап;
Несиелеу мерзімі: 6 айдан 25 жылға дейін.

Әлеуметтік осал топтарға арналған бағдарламалар

«Бақытты отбасы» бағдарламасы

«Бақытты отбасы» бағдарламасы көпбалалы және аз қамтылған отбасыларға, мүгедек балаларды тәрбиелеп отырған отбасыларға арналған. Бағдарлама бойынша бастапқы және қайталама нарықтан баспана сатып алуға немесе жеке үй салуға болады.

Шарттары:

Мөлшерлемесі: жылдық 2%.
Бастапқы жарна: 10%-дан бастап.
Берілетін қарыздың ең жоғары мөлшері: 15 млн теңгеге дейін.

«Шаңырақ» (5-10-20) бағдарламасы

«Отбасы банк» арқылы жүзеге асырылатын бұл бағдарлама мемлекеттік тұрғын үй кезегінде тұрған азаматтарға арналған.

Шарттары:

Мөлшерлемесі: жылдық 5%.
Бастапқы жарна: 10%-дан бастап.
Несие мерзімі: 20 жылға дейін.

"Серіктестік бағдарламалар"

Құрылыс компаниялардың дерлігі клиенттеріне арнайы «серіктестік бағдарламалар» аясында ипотека ұсынады. Әдетте ол ипотекалардың жылдық пайыздық мөлшерлемесі нарықтағы екінші деңгейлі банктер ұсынатын стандартты мөлшерлемелерден едәуір төмен болады. Сондықтан құрылыс компаниясына үй іздеп барған кезде бұл мүмкіндікті қарастырып көрген жөн.

Егер сенімділігі нарықта дәлелденген компанияны таңдасаңыз, құрылысы жаңа басталған үйден әлдеқайда төмен бағада пәтер сатып алуға болады.

Пәтерді макеттегі жоспарлау бойынша таңдағаннан кейін үй құнының 20%-ын бастапқы жарна ретінде төлеп, пәтерді алдын ала «броньдау» арқылы бағаны бекітіп қоясыз. Бұл тәсіл іргетасы енді қаланып жатқан үйдегі пәтердің қолайлы бағасын сақтап қалуға мүмкіндік береді. Кейін құрылыс компаниясы ұсынған серіктестік бағдарламалар аясындағы банктердің пайыздық мөлшерлемелерін салыстыра отырып, ең тиімді ипотеканы таңдауыңызға болады.