31 там, 2016 сағат 19:23

ІІМ: Алты айда 10 мың оралман көшіп келді

Оралмандардың Өскемен түбіндегі Нұрлы көш ауылы. (Көрнекі сурет)

"2016 жылдың алғашқы жартысында Қазақстанға 17 мың 23 адам көшіп келді, оның 10 мың 620-сы - этникалық қазақтар", - деп хабарлады ішкі істер министрлігі (ІІМ). Министрлік дерегінше, осы уақыт аралығында Қазақстаннан шет елдерге 16 мың 700 адам қоныс аударған.

Былтыр 25 мың 197 адамға Қазақстанда тұрақты тұру рұқсаты берілген, оның 9 мың 951-і - оралман. 2015 жылы Қазақстаннан көшіп кеткендердің саны 33 мың 468 адам болған.

2010-2015 жылдар аралығында 212 мың 600 шетелдікке Қазақстанда тұрақты тұруға рұқсат берілген, оның 114 мың 900-і - оралман.

Қазақстанға көшіп келушілердің дені Алматы және Маңғыстау облыстарына қоныстанған. Елге келгендердің көбі ТМД аумағынан қоныс аударған. Ал кетушілердің көбі Ресей мен Германияға аттанған.