Фрилансерлер, қос қызметте істейтіндер және еңбек келісімшарты барлар міндетті зейнетақы жарнасын төлеуден босатылады, деп хабарлайды "Ұлт ақпарат" ҚР Еңбек және халықты әлеуметтік қорғау министрлігінің баспасөз қызметіне сілтеме жасап.
2018 жылдың 27 желтоқсанындағы ҚР «Қазақстан Республикасының халықты жұмыспен қамту мәселелері бойынша бірқатар заң актілеріне өзгерістер мен толықтырулар енгізу туралы» Заңына енгізілген түзетулер міндетті зейнетақы жарнасын төлеу процедураларын оңтайландыруға бағытталған.
Енгізілген өзгерістер осы санаттағы жұмыс істейтін азаматтардың, депутаттық корпус өкілдерінің, бірқатар заңды тұлғалардың, «фрилансер» қызметін пайдаланып отырғандардың басым бөлігінің пікірін назарға алып отыр.
Қабылданған заңнамалық өзгерістерді жүзеге асыру үшін 2019 жылдың бірінші тоқсанында тиісті ережелерге өзгерістер енгізілетін болады. Өзгерістер қабылданған сәттен бастап, жалдамалы жұмысшы ретінде қос қызметте жүрген азаматтар (яғни жеке еңбек келісім-шартын жасау аясында) және азаматтық-құқықтық негіздегі келісім бойынша жұмыс істеп немесе қызмет көрсетіп жүргендер, табыс көзінен міндетті зейнетақы жарнасын төлеуден босатылады.
Азаматтық-құқықтық негізде келісімшарт бойынша жұмыс істеп жүрген жеке тұлғалар үшін міндетті зейнетақы жарнасын заңды тұлғалар, жеке кәсіпкерлік және жеке тәжірибемен айналысатын тұлғалар төлейтін болады. Олар салық агенті ретінде «фрилансерлер» үшін жеке табыс салығын есептеп, төлейді.
Сондай-ақ азаматтық-құқықтық келісімшарт бойынша жұмыс істеп жатқандар, жеке тұлғалармен келісімге отырған жеке тұлғалардың жинақтаушы зейнетақы жүйесіне қатысу құқығы сақталады. Олар өз бетінше де міндетті зейнетақы жарнасын төлей алады.
1628 рет оқылды
