2018 жылдың екінші жартысынан бастап, «Эйр Астана», «ҚазМұнайГаз», «Қазатомөнеркәсіп» сынды ұлттық компанияларды жекешелендіру басталады, деп хабарлайды "Ұлт ақпарат" ҚазАқпарат агенттігіне сілтеме жасап.
Бұл туралы «Астана» халықаралық қаржы орталығының (АХҚО) басқарушысы Қайрат Келімбетов ҚР Сыртқы істер министрлігінде өткен «ЭКСПО-2017 мұрасы» атты дөңгелек үстелде мәлім етті.
«Өздеріңіз білетіндей, келесі жылы «Самұрық-Қазына» ұлттық компаниялармен бірлесіп, жекешелендіру бағдарламаларын бастайды. «Самұрық-Қазына» екі жылдан бері «Эйр Астана», «ҚазМұнайГаз», «Қазатомөнеркәсіп» және өзге де компанияларды жекешелендіруді жоспарлап жүр. Мұндай жекешелендірулер 2018 жылдың екінші жартысында басталады деп жоспарлануда. Және барлық жұмыстар АХҚО алаңында жүзеге асырылады деп үміттенеміз», - деді Қ.Келімбетов.
Оның айтуынша, қазіргі уақытта АХҚО «капиталды нарық секілді бірқатар мәселелермен айналысуда».
«Қазақстанда капитал нарығын қайта іске қосуға талпынудамыз. Сондай-ақ, бұл жұмыстар Қазақстандағы жекешелендіру ісіне де қатысты болмақ», - деп атап өтті АҚХО басқарушысы.
Еске сала кетсек, «Астана» халықаралық қаржы орталығы (АХҚО) 2018 жылдың 1 қаңтарында толыққанды жұмысын бастайды және оның халықаралық таныстырылымы 2018 жылдың 5 шілдесіне жоспарланған.
3713 рет оқылды
