Мемлекет басшысы Қасым-Жомарт Тоқаевтың атына Түркия Президенті Режеп Тайип Ердоғанның жолдау хаты келіп түсті, деп хабарлайды "Ұлт ақпарат" Ақордаға сілтеме жасап.
Құжатта еліміздің жаңа коронавирусқа қарсы қабылдап жатқан кешенді іс-әрекеттеріне жоғары баға берілді.
«Қазақстанда COVID-19 індетіне қарсы қабылданып жатқан тиімді шаралар мен жұмыстарыңызды мұқият қадағалап отырмыз. Ең алдымен, індетпен күресте алғы шептегі медицина қызметкерлерінің жұмысына табыс тілеймін. Қазақ халқы бұл дағдарысты аз шығынмен еңсеретініне сенімім мол. Осы орайда, достас әрі бауырлас Қазақстанға қол ұшын созуға әрдайым дайынбыз. Қазақстандық достарымыздың күш-жігеріне қолдау болар деген ниетпен еліңізге медициналық жабдықтар жіберудемін», – делінген хатта.
Түркия Президенті коронавирус пандемиясы салдарынан қайтыс болған Қазақстан азаматтарының отбасыларына көңіл айтып, қауіпті ауру жұқтырғандардың тезірек сауығуына тілектестігін жеткізді.
Сондай-ақ, Режеп Тайип Ердоған ортақ тарих пен бауырластықтан бастау алатын екіжақты стратегиялық әріптестік қазіргі дағдарыстан кейін әрі қарай беки түсетініне сенімді.
1096 рет оқылды
