Алғыс айту күні - бейбітшілік пен достыққа, тыныштық пен ынтымаққа үндейтін мереке. Бұл кеңқұшақ құрмет - еліміздегі түрлі ұлт өкілдерінің арасындағы адамгершілік қарым-қатынастың өнегелі өлшеміне айналды. Алғыс айту күні - халқымыз үшін айтулы ізгі дәстүрдей.
Қазақстан халқы бүгін тарихында алтыншы рет Алғыс айту күнін атап өтеді.
Міне, осы мерейлі сәтке орай еліміздің атын төрткүл әлемге паш етіп жүрген дарынды ұлымыз Димаш Құдайбергеннің малайзиялық тыңдармандары қазақ халқына және әншінің өзіне шынайы, ақжарма тілектерін білдіре келе, алғыс айту күнімен құттықтап, арнайы видео-сәлемдемесін жолдады.
Еске сала кетейік, 2016 жылдың 14 қаңтарында Елбасы Нұрсұлтан Назарбаев Жарлыққа қол қойып, оған сәйкес, 1 наурыз - елімізде Алғыс айту күні деп жарияланды.
Н. Назарбаев 2015 жылдың 22 сәуірінде Ассамблеяның XXII сессиясында Алғыс айту күнін белгілеуге не түрткі болғанын тарихпен байланыстыра отырып айтып берген еді. Тұңғыш Президент сталиндік режім кезінде Қазақстанға көптеген халықтар жер аударылғанын - 800 мыңға жуық неміс, 102 мың поляк, 550 мың Солтүстік Кавказ халқының өкілдері, 18,5 мың Қиыр Шығыстағы корей отбасылары көшіп келуге мәжбүр болғанын еске салған болатын.
Тағдырдың тәлкегімен елімізге қоныс аударған түрлі этнос өкілдерін қазақ халқы құшақ жая қарсы алып, ауыртпалық атаулыны бірге көтерді. Бұл күн - қиын-қыстау кезеңдерде қуаныш-қайғыны бөлісіп, пана бола білген қазақ халқына өзге ұлт өкілдерінің алғыс айтатын күні.
1448 рет оқылды
_80_80.jpg)
