Фото: parlam.kz
Мәжіліс депутаты Арман Қалықов Қазақстанға геология және жер қойнауын қорғау салаларын дамытуға жауапты жаңа министрлік қажет екенін айтты, - деп хабарлайды Massaget.kz порталы.
Мәжілісмен Премьер-Министр Әлихан Смайыловқа жолдаған депутаттық сауалында мемлекеттік органдар кен орындарына тиісті мемлекеттік бақылауды және оларды "халық мүддесі үшін" ұтымды пайдалануды қамтамасыз етуге тиіс екенін атап өтті.
"Қатты пайдалы қазбаларға мүдделі мемлекеттік органдар жер қойнауын нарық еркіне жіберіп, саланы реттеуден қалды. (...) Қазір мемлекеттік бақылау жер қойнауын пайдаланушы ұсынған есептілік деректері бойынша ғана жүзеге асырылады", - деді парламентарий.
Оның айтуынша, пайдалы қазбалар қорларының сарқылу мәселелері ерекше назар аударуды қажет етеді.
Қалықовтың сөзінше, осы мәселелердің барлығын реттеу үшін жеке ведомство қажет.
"Осыған байланысты геологиялық саланы жүйелі дамыту үшін жеке мемлекеттік орган - Геология және жер қойнауын қорғау министрлігін құру дұрыс сияқты", - деп қосты мәжілісмен.
Депутат министрлік перспективаға және ағымдағы үш-бес жылдық кезеңдерге арналған жер қойнауын зерттеудің мемлекеттік бағдарламаларын әзірлеуге, минералдық-шикізат базасын толықтыруды қамтамасыз етуге тиіс екенін, бұл өз кезегінде шикізат ресурстарын игеруде мемлекеттік-жекешелік әріптестіктен барынша экономикалық тиімділікке әкелетінін атап өтті.
518 рет оқылды
