10 жел, 2025 сағат 13:02

БЖЗҚ зейнетақы жинағының ең төменгі жеткіліктілік шегіне өзгеріс енгізді

Фото: NewTimes.kz

Зейнетақы жинақтарының 2026 жылға арналған ең төменгі жеткіліктілік шегін Бірыңғай жинақтаушы зейнетақы қоры ресми сайтында жарияланды, деп хабарлайды Ult.kz.

Онда 2026 жылы ТЖШ мөлшері орта есеппен 10% өскені жазылған.

"Зейнетақы жинақтарының ең төменгі жеткіліктілік шегі ағымдағы және болжамды әлеуметтік-экономикалық көрсеткіштерге, ең төменгі зейнетақы мөлшеріне, ең төменгі жалақыға, ең төменгі күнкөріс деңгейіне, сонымен қатар инфляция мен инвестициялық кірістілікке сүйене отырып есептеледі", – делінген БЖЗҚ ресми сайты жариялаған ақпаратта.

ТЖШ есептеуде 2026 жылға арналған мынадай әлеуметтік-экономикалық көрсеткіштер ескеріліп, пайдаланылған.

– Ең төменгі жалақы мөлшері – 85 000 теңге;
– Зейнетақының ең төменгі мөлшері – 69 049 теңге;
– Ең төменгі күнкөріс деңгейі – 50 851 теңге.

Еске салайық, ТЖШ – бұл салымшыны ай сайынғы зейнетақының ең төменгі мөлшерінен төмен емес мөлшерде қамтамасыз ету үшін қажетті зейнетақы жинақтарының ең төменгі мөлшері.

"Осылайша, 2026 жылы ТЖШ мөлшері орта есеппен 10%-ға өсті. Бұл жалпы инфляцияның ағымдағы және болжамды мәндеріне сәйкес келеді", – деп жазылған мәліметте.