03 ақп, 2022 сағат 14:57

Бейнеу тұрғыны лото-клубты өртеп, ісін видеоға түсірген

Маңғыстау облысы Бейнеу ауылының тұрғыны лото-клубты өртеп, ісін видеоға түсірген. Оқиға 3 ақпанда болған, - деп хабарлайды Tengrinews.kz тілшісі.

Оқиғаның видеосы әлеуметтік желілер мен мессенджерлерде пайда болды. Өзін камераға түсірген ер адамның айтуынша, "мұндай ойындар адамдар мен жастарды қызықтырады, құмарлық - ауру". Ол барлық қызметкерден өрт алдында ғимаратты босатуын сұрағанын айтты. Өйткені "ешкімге зиян тигізгісі келмеген".

Полиция мәліметінше, ойын клубы ғимаратындағы өрт туралы қоңырау шамамен 11.00-де келіп түскен.

"Оқиға орнына келген полиция жасағы ер адамды ұстады. 36 жастағы ер адам кінәсін мойындады. Сондай-ақ, ол WhatsApp мессенджерінде Loto ойын клубына қалай от қоятынын көрсететін видео таратқанын айтты", - деді полиция қызметкері.

Бұл дерекке қатысты Қылмыстық кодекстің 202-бабы "Бөтеннің мүлкін қасақана жою немесе бүлдіру" бойынша сотқа дейінгі тергеу басталды.