Бүгін Сыртқы істер министрі Бейбіт Атамқұловтың Қазақстандағы Біріккен Араб Әмірліктері, Иордания, Ирак, Катар, Кувейт, Ливан, Ливия, Марокко, Оман, Палестина, Сауд Арабиясы дипломатиялық өкілдіктерінің басшыларымен жұмыс кездесуі өтті, деп хабарлайды "Ұлт ақпарат".
Елшілер шетелдік инвестицияларды тарту және шетелге қазақстандық экспортты жылжыту саласында Сыртқы істер министрлігінің жаңа өкілеттіктерімен танысты. Өз кезегінде, Б.Атамқұлов Қазақстанның сауда-экономикалық қатынастарды дамытуға, сондай-ақ энергетика, логистика, ауыл шаруашылығы және басқа да салаларда бірлескен инвестициялық жобаларды жүзеге асыруға мүдделілігін атап өтті. "Президент Нұрсұлтан Назарбаев араб әлемімен жан-жақты және өзара тиімді ынтымақтастықты нығайтуға айрықша маңыз береді", деді министр өз сөзінде.
Жиын барысында осы уақытқа дейін араб елдерінің көпшілігімен сауда-экономикалық және инвестициялық салаларда өзара іс-қимылдың зор әлеуеті әлі күнге дейін толығымен пайдаланылмағаны да айтылды.
Министр 2018 жылы Қазақстанның барлық 22 араб елімен жиынтық тауар айналымының көлемі 1 млрд АҚШ доллардан аспағанына, ал инвестициялардың жалпы көлемі бүгінде не бәрі 2,4 млрд АҚШ доллар болғанына назар аударды. Сонымен бірге қазіргі уақытта сомасы 9 млрд АҚШ доллары болатын бірлескен жобалар пыстықталып жатқанын тілге тиек етті.
Сауда-экономикалық ынтымақтастықты жандандыру мақсатында көлік және логистика саласындағы проблемаларды шешуге, визалық режимді жеңілдету арқылы туристік әлеуетті дамыту қажеттігіне ерекше назар аударылды.
Осыған байланысты, қазақстандық СІМ басшысы араб әріптестерін екіжақты ынтымақтастықтың барлық бағыттары бойынша белсенді іс-қимылға шақырды.
Сонымен қатар Б.Атамқұлов үстіміздегі жылдың 1-2 наурызында Абу-Даби қаласында өтетін Ислам ынтымақтастығы ұйымы (ИЫҰ) Сыртқы істер министрлері Кеңесінің 46-шы отырысының жұмысына қатысатындығын растады. Ол күн тәртібінде біздің елдерімізге қатысты мәселелердің кең ауқымын енгізілгенін атап өтті. СІМ басшысы осы іс-шара аясында ИЫҰ-ға мүше елдер сыртқы істер ведомстволарының басшыларымен, соның ішінде араб министрлерімен кездесетінін жеткізді.
1442 рет оқылды
