"Ақмола облысына қарасты Ақкөл ауданының орталығында ашылған заманауи бассейн салауатты өмір салтын ұстанған елдің игілігіне жарап тұр. Үш жолақты жасанды айдында жыл он екі ай жүзуге мүмкіндік бар. Рио Олимпиадасын қалт жібермей, қадала қарайтын жергілікті халық заман талабына сай тамаша бассейнге еліміздің мерейін асырған Дмитрий Баландиннің есімін беруді қош көріп отыр", - деп хабарлайды Ұлт.кз тілшісі. 24.kz арнаға сілтеме жасап.
Әуелі Ақкөлде салынған ғимарат туралы екі ауыз сөз. Ине-жіптен екі жыл бұрын шыққан жасанды айдында алғашқыда мектеп оқушылары жүзетін. Кейін ауылда тұратын кәрі-жас малтуға машықтанды. Бұрын құлақ естіген, бірақ көз көрмеген кереметті жергілікті жұрттың жақтырғаны анық.
"Күніне кемінде 120 әуесқой келеді. Жас мөлшерлері әртүрлі. Жасы да бар, жасамысы да бар. Мұнда суға жүзуді кәсіби меңгергісі келетіндер көп. Шәкірттерімнің алды республикалық жарыстарға қатысып жүр. Енді әлемдік додаға түссе деймін" - дейді жаттықтырушы Сергей Девятко.
Дмитрий Баландин бәйгеден келген күні ақкөлдіктер тың бастама көтеріпті. Ғимаратқа Олимпиада чемпионының есімін беру туралы ұсыныс түсірген.
"Бассейнді қалай атауды ойланып жүр едік. Енді, міне, чемпион атымен атайтын боламыз. Себебі Ақкөл тұрғындары өтініш білдірді. Осы бізден де, Ақкөлден де чемпион шықсын деген үміттеміз" деп қостады жаттықтырушының сөзін аудандық жастар орталығының жетекшісі Мадина Құсайынова.
Баландин атындағы жүзу бассейні. Несі бар, жарасып тұр. Чемпионға құрмет, саңлаққа тарту секілді. Сосын үміт үкіленеді. Балалар Ақкөлде шынығып, әлем біріншілігіне қатысып жатса, қандай ғажап! Жиырма бес метрлік, үш жолақты, суы мөлдір екен. Жүзіп жүргендердің де пікірі жақсы.
"Күнде келіп түсіп жатырмыз. Суы таза, бәрі де жақсы, жаттығушылар да жақсы. Кеше естідік, Баландин Рио Олимпиадасында чемпион атаныпты. Құтты болсын!" - дейді болашақ Баландиннің аты берілетін бассейіннің бүгінгі тұтынушысы Адайбек Абдуллаев.
Ақкөл жұрты жыл он екі ай жылы суда жүзеді. Шеберліктерін шыңдайды. Малтуға машықтанады. Жастары Дима ағалары секілді Олимпиада шыңын бағындыруды армандайды. Арманның аласасы бола ма?!
2301 рет оқылды
