Фото: Зеленскийдің телеграм арнасынан
Украина президенті Владимир Зеленский 28 ақпанда Ақ үйдің Овал кабинетінде АҚШ президенті Дональд Трамппен арада туындаған қақтығыс туралы пікір білдірді, деп хабарлайды Ult.kz.
Ол «Украинаның бейбітшілікке деген адалдығын растайтынын» және командасымен бірге «Трамп президенттің мықты көшбасшылығымен тұрақты бейбітшілікке қол жеткізуге дайын екенін» Х әлеуметтік желісінде жазды.
Қарулы қақтығысты тоқтату туралы келісімнің алғашқы қадамдары ретінде Зеленский «тұтқындарды босату және әуе кеңістігінде тыныштық орнатуды» ұсынды. Бұл зымырандарды, ұзақ қашықтыққа арналған ұшқышсыз аппараттарды, энергетикалық және азаматтық инфрақұрылымдарға жасалатын бомбалауды тоқтату, сондай-ақ Ресей тарапынан да осындай қадам жасалған жағдайда теңіздегі оқ атуды дереу доғаруды қамтиды.
«Содан кейін біз барлық келесі қадамдарды тез арада жүзеге асырып, АҚШ-пен түпкілікті келісім орнату бойынша жұмыс істегіміз келеді», — деп жазды Зеленский.
Ол Вашингтондағы Ақ үйде жұма күні өткен кездесу «болжанғандай өтпегенін» айтты:
«Бәрі осылай болғаны өкінішті. Барлығын түзететін уақыт келді. Алдағы ынтымақтастық пен байланыстардың құрылымды болғанын қалаймыз».
Сондай-ақ Зеленский Украина «пайдалы қазбалар мен қауіпсіздік туралы келісімді кез келген уақытта және кез келген ыңғайлы форматта» қол қоюға дайын екенін хабарлады:
«Бұл келісімді біз қауіпсіздікті күшейту мен сенімді кепілдіктерге қарай жасалған қадам деп санаймыз және оның тиімді жұмыс істейтініне шын жүректен үміттенеміз».
4 наурызда АҚШ президенті Дональд Трамп Конгрестің бірлескен отырысында сөз сөйлеп, Украинаға қатысты өз жоспарларын жариялайды деп күтілуде. Ол бұл мәселеде «барлығын ашық айтамын» деп уәде берді.
Бұған дейін АҚШ Украинаға әскери көмекті тоқтататыны туралы жазғанбыз.
330 рет оқылды
