Фото: ашық дереккөз
Абай облысында стратегиялық маңызы бар «Бақты – Аягөз» теміржол жобасының іске асырылу барысы талқыланды, деп хабарлайды Ult.kz.
Жұмыс сапары аясында Жәнібек Тайжанов Абай облысына барып, облыс әкімінің орынбасары Серік Төленбергенов қатысуымен арнайы кеңес өткізді. Жиын барысында теміржол құрылысының қазіргі жағдайы және жобаға қатысушы тараптардың жұмысын үйлестіру мәселелері қаралды.
Кеңеске Қазақстан темір жолы ұлттық компаниясының, Самұрық-Қазына қорының өкілдері, сондай-ақ бас мердігер – China Harbour Engineering Company Ltd. компаниясы мен жобалаушы ұйым өкілдері қатысты.
Стратегиялық маңызы бар жоба
«Бақты – Аягөз» теміржол желісі елдің көлік инфрақұрылымын дамытуда және Транскаспий бағытындағы трансқазақстандық теміржол дәлізін қалыптастыруда маңызды рөл атқарады.
Жобаның негізгі көрсеткіштері:
теміржолдың жалпы ұзындығы – 303 шақырым;
11 бөлек пункт салу жоспарланған;
68 көпір және 355 су өткізу құбыры тұрғызылады.
Құрылыс 2027 жылы аяқталады
Жоспар бойынша теміржол құрылысы 2027 жылдың соңына дейін аяқталуы тиіс. Қазіргі уақытта инженерлік іздестіру жұмыстары толық аяқталған. Сонымен қатар Ай, Шолпан, Үржар және Бақты учаскелерінде төрт вахталық қалашық салынған.
Көлік вице-министрі жобаны белгіленген мерзімде іске асырудың маңыздылығын атап өтті. Оның айтуынша, құрылысқа қатысушы барлық тарап тиімді әрі үйлесімді жұмыс істеуі қажет.
Министрлік мәліметінше, жобаның жүзеге асуы Қазақстан темір жолы, мердігер ұйымдар және жергілікті атқарушы органдармен бірлесіп тұрақты бақылауда.
_80_80.jpeg)
