Фото:Getty Images
Бокстан бұрынғы абсолютті әлем чемпионы, америкалық Майк Тайсон мансабын аяқтағысы келмейді және келесі жекпе-жегін 2025 жылы өткізуді жоспарлап отыр. Бұл туралы ТАСС агенттігіне Тайсонның өкілі хабарлады.2024 жылдың 15 қарашасында Майк Тайсон рингте 27 жастағы Джейк Полмен кездесті. Ұйымдастырушылар бұл жекпе-жекті өмірде бір рет болатын «армандағы жекпе-жек» деп атады. Бірақ Майк Тайсон бұл жекпе-жекте төрешілердің біріңғай шешімімен жеңіліп қалды.
«Майк әлі бокстасқысы келеді. Ол келесі жекпе-жегін 2025 жылы өткізуі мүмкін. «Біз оның қарсыласымен мәселелерді кейінірек талқылаймыз», - деді Тайсонның өкілі.
Майк Тайсон ауыр салмақтағы кәсіпқой боксшы, оның есімі бүгінгі күнге дейін әлем бокшылары мен спор сүйер қауым арасында ең танымал. Соққы күші мен рингтегі агрессивті мінез-құлқы оны бүкіл әлемде әйгілі етіп, “Темір Майк” деген лақап атқа ие болды.
Фото:Getty Images
Балалық шағы
Майк Тайсон Американың Бруклин-Браунсвил ауданында 1966 жылы дүниеге келген. Ол әкесіз өскен, анасы да баласына көңіл бөлмегені себепті Майк Тайсонның жас кезі қиындыққа толы болыпты. Темір Майк жастық шағында ауыр мінезді бала болып өскен. Ол көгершіндерді ұнатып, оларға күтім жасауды жақсы көрген. Тайсон бұл құстарды әлі де жақсы көреді.
10 жасында күтпеген жерден жергілікті банданың арасында құрметке ие болады. Бұзақылардың бірі көгершінді оның қолынан тартып алып, демонстрациялық түрде құстың басын жұлып алады. Содан кейін Майк қылмыскерге шабуыл жасап, оны ұрып-соғады.
Осы оқиғадан кейін жас Тайсон көшедегі бандаға қосылып, дүкендер мен үйлерді тонауды үйренген. 13 жасында 38 рет қамауға алынып, ұсақ қылмыс оның өмірінің бір бөлігіне айналады.
Қылмыс кезінде қолға түскен Тайсон, кәмелетке толмаған құқық бұзушыларға арналған арнайы мектепке жіберіледі. Мектепте бұрынғы боксшы Бобби Стюартті кездестіреді де, боксшы оны оқу нәтижелерін жақсарту шартымен жаттықтыруға келіседі. Көп ұзамай жас спортшы үздік студенттердің бірі болады. Содан кейін аты аңызға айналған жаттықтырушы Кас Д'Амато оны қамқорлығына алып, жаттықтыра бастайды. Тайсонның анасы қайтыс болғаннан кейін Д'Амато оны асырап алған.
Бокстағы мансабының басталуы
Майк Тайсон 15 жасында әуесқой бокста дебют жасап, 1981 жылға қарай алты жекпе-жектің біреуінен ғана жеңіліп қалған. 1982 жылы жасөспірімдер Олимпиадасының жеңімпазы атанған, бірақ іріктеу кезеңінде басқа спортшыдан жеңіліп, 1984 жылғы Олимпиада ойындарына жолдама ала алмай қалады.
Тайсон кәсіпқой бокстағы алғашқы жекпе-жегінде 1985 жылы пуэрто-рикалық Гектор Мерседесті жеңген.
1985-1986 жылдар аралығында 28 жекпе-жек өткізіп, оның 26-сында жеңіске жеткен (көбісі нокаутпен).
Осыдан 38 жыл бұрын, 1986 жыл 22 қарашада Майк Тайсон ауыр салмақта тарихтағы ең жас әлем чемпионы атанды. Ол Тревер Бербикпен рингке шыққанда әлем баспасөзі сол күнді бокстағы “Ақырзаман күні” деп шулатқанда Майк Тайсонның жасы небәрі 20 да еді. Осы жекпе-жектен кейін ол Гиннестің рекордтар кітабына еніп, бұл нәтиже әлі күнге дейін өзгерген жоқ.
Фото:Getty Images
Майк Тайсон спорттық мнсабында 58 жекпе-жек өткізген. Оның 50-ін (44 нокаут) жеңіспен аяқтаған. Жеті рет жеңілген. Екі жекпе-жегі жарамсыз деп танылды. Ол WBC, WBA және IBF тұжырымдары бойынша абсолютті әлем чемпионы атағына ие әлем жұлдызы.
Тайсон төңірегіндегі дау
1991 жылы боксшы “зорлау” бабымен айыпталып, 1992 жылы алты жылға бас бостандығынан айрылады. 1995 жылы Тайсон мерзімінен бұрын бостандыққа шығарылған.
Түрмеден шыққаннан кейін Тайсон рингке оралып, WBC және WBA титулдарын жеңіп алады (1996). 1996 жылы қарашада Эвандер Холифилдтен жеңіліп, WBA чемпиондық белбеуінен айырылды.
1997 жылдың жазында бокшылар арасында реванш жекпе-жегі кезінде Тайсон Холифилдтің құлағының бір бөлігін тістеп алады, жекпе-жекте Тайсон дисквалификацияланады.
Зейнетке шығуы
1998 жылдың қазан айында Тайсонның бокс лицензиясы қалпына келтіріліп, рингтегі жарысты жалғастырды. Одан кейінгі жекпе-жектерде боксшы бірнеше рет жеңіске жетті, бірақ 2002 жылы Леннокс Льюиспен жекпе-жегінде сәтсіздікке ұшырады.
2000-шы жылдардың басында Тайсон өзінің формасында емес екені білінді. 2005 жылдың маусымында Кевин Макбрайдтан жеңілгеннен кейін зейнетке шығатыны туралы мәлімдеме жасаған. Зейнетке шыққаннан кейін Тайсон Кори Сандерспен (2006) және Рой Джонспен (2020) көрмелік жекпе-жектерге қатысқан.
Фото: Reuters/ScanPix
Жеке өмірі
Тайсоннның жеке өмірі де қиындыққа толы болды. Өйткені ол осы кезге дейін үш рет отау құрған. Майк Тайсон 2009 жылы Лакия Спайсерге үйленген. Бұл оның үшінші некесі. Боксшының бірінші әйелі актриса Робин Гивенс (1988–1989), ал екіншісі – дәрігер Моника Тернер (1997–2003).
Бокстан тапқан байлығы
Тайсонның бокстық мансабындағы жалпы табысы шамамен 300-400 миллион долларға бағаланады. Дегенмен, оның қаржылық жағдайы тұрақсыз екені көп айтылады. Мысалы, 2003 жылы боксшы өзін банкрот деп жариялады. Содан кейін Тайсон ақшаны көп жұмсау әдеті мен қаржылық сауатсыздығынан 300 миллион долларға жуық ақшадан айрылғанын айтқан.
16764 рет оқылды
