Астана әкімі Бақыт Сұлтанов ауа райына байланысты қала тұрғындарына өтініш жасады, деп хабарлайды "Ұлт ақпарат" елорда әкімдігінің баспасөз қызметіне сілтеме жасап.
Астанада боран басталып, аяз күшейді.
«Қазгидрометтің» ақпараты бойынша 5 ақпан күні Астана аумағында қар жауып, бұрқасын болады. Батыстан, солтүстік-шығыстан соққан жел екпіні секундына 15-20 метр болады, ал 6-7 ақпанда түнде аяз -37-39 градусқа дейін жетеді. Осыған байланысты елорда әкімі Бақыт Сұлтанов қала тұрғындары мен қонақтарына өтініш білдірді.
Әкім барлық ұйымдардың басшыларына және жеке кәсіпкерлерге қарата аязда қалған жандарға көмек көрсетуге және жұмыс, оқу орындары, тұрғын үй-жайлардағы жылуға көңіл бөліп, далада тұрған адамдарға жылынуға рұқсат беруге, мүмкіндік болса бойын жылыту үшін ыстық шай беруге шақырды.
Бақыт Сұлтановтың айтуынша, қатты аяз күндері тұрғындарға мұқият болу, бір-біріне қамқорлық көрсетіп, жаяу жүргіншілерді мүмкіндігінше жеткізіп салғандары дұрыс. Қала басшысы мемлекеттік органдар, білім беру мекемелері, кәсіпкерлік объектілер (базарлар, СОСО) және құрылыс алаңдарында жұмыс уақытын қысқартуды ұсынды. Ал қала тіршілігін қамтамасыз ететін өрт сөндіру, полиция қызметі, төтенше жағдайлар департаменті, жедел медициналық көмек, медициналық мекемелер, коммуналдық қызмет қызметкерлері әдеттегі кестемен жұмысын жалғастырады.
Аудан әкімдеріне пәтер иелері кооперативтерімен бірлесе отырып тұрғындардың қауіпсіздігін қамтамасыз ету, тұрғын үйлердің қасбеттерін және үй-жайлардың шатырының, қоршаулардың ұшуынан болатын жазатайым оқиғалардың алдын алу мәселелерін пысықтау тапсырылды. Одан бөлек, әкім қалалық коммуналдық қызметтерге қоғамдық көлік жолаушыларына арнап аялдамаларда және адам көп жиналатын орындарда жылыну орындарын ұйымдастыруды және ТЖД-нің жұмысын күшейтуді тапсырды.
Сонымен қатар, жолаушылар қауіпсіздігін қамтамасыз ету мақсатында қаладан Тельман кенті, Қосшы және Пригородныйға қатынайтын негізгі бағыттар бойынша ТЖД-ның арнайы техникасы кезекшілікте жүретін болады. Құтқарушылар «Азия парк» СҮ, «Саянұр-2» ТК, Бейсекова көшесінен қатынайтын болады.
1598 рет оқылды
