Арыс қаласындағы төтенше жағдайды жою барысында зардап шеккен екі әскери қызметші Әскери-клиникалық госпитальден шығарылып, Алматыдағы өздерінің әскери бөлімдеріне орналастырылды. Бұл жайында ҚР Қорғаныс министрлігінің баспасөз қызметінен мәлім етті, деп хабарлайды "Ұлт ақпарат".
Медициналық мекеме мәліметінше, емделушілер әскери-дәрігерлік комиссиядан өткен. Қазіргі кезде олардың жағдайы жақсы. Госпитальдан шығарылған әскери қызметшілер толықтай қалыпқа келгенге дейін әскери қызметтік міндетінен босатылды.
Қазіргі кезде қалған 8 әскери қызметші Алматы қаласындағы әскери госпитальде ем алып жатыр. Әскери дәрігерлер олардың жағдайын бірқалыпты деп бағалауда. Әскери-клиникалық гопиталь бастығы, медициналық қызмет полковнигі Самат Сәрсеновтің айтуынша, қажетті аспаптық зертханалық-диагностикалық тексерулер жүргізіліп, жоспарлы ем қабылдау жалғасуда.
Бұған дейін хабарлағанымыздай, 21 қыркүйекте арнайы топ Арыс қаласынан 60 шақырымда орналасқан арнайы-жабдықталған полигонның аумағында шетел сарапшыларының нұсқаулары мен ұсынымдарына сәйкес, жоспарлы жару жұмыстарын жүргізді.
Жұмыс барысында жарылыс шұңқырының түбінде қол гранатасының тұтандырғыш бөлігінде жарылыс болды.
848 рет оқылды
