Фото: ҚР Парламенті Мәжілісі
Мәжіліс депутаты, белгілі айтыскер ақын Аманжол Әлтаев Ult.kz-ке Мемлекет басшысы ел тізгінін қолға алған алты жыл ішінде саясат сахнасында ғана емес, өнер, мәдениет саласында да елеулі өзгерістер болғанын айтты.
"Осы уақыттың ішінде біздің мына мәдениет саласында үлкен-үлкен өзіндік бір жаңалықтар болды. Оны көре білуіміз керек. Бұл мәселе кешегі құрылтайдағы басқосуда да жан-жақты айтылды. Енді кино саласында да қордаланған мәселелерді шешу үшін нақты тапсырмалар берілді", – деген депутат соңғы жылдары төл мәдениетімізге, ұлттық өнерімізге, ұлттық руханиятымызға ерекше көңіл бөлініп келе жатқанын жасырмады.
Яғни А.Әлтаев өткен отыз жылдың ішінде әттеген-ай дегізетін қордаланған мәселелер руханият, мәдениет саласында да бар екенін айтты.
"Кейінгі жылдарда тек қана саяси, экономикалық реформаларды ғана емес, жалпы руханият, мәдениет саласындағы жетілдіретін тұстарымызды Мемлекет басшысы әрбір Жолдауында да, халық алдындағы сөйлеген әрбір сөзінде де назарынан тыс қалдырған емес. Және де сол құр айтылып қана қойған жоқ. Өзінің жүйелі түрде жалғасын тауып, нәтижесін көрсетіп келе жатыр. Бұл енді бәрі бірдей бір күнде орындала салатын мәселе емес қой. Яғни ұзақ жылдарға жүйелі түрде бекітілген бағыт-бағдар. Сондықтан да тек қана Президенттің аузына қарап отырмай, зиялы қауым өкілдері, бірінші кезекте өзіміз, яғни мәдениет саласының өкілдері күш біріктіріп, ойға ой қосып, ұсыныстарымызды ортаға салып, осы мәдениет саласының дамуына үлесімізді қосуымыз керек", – деді Аманжол Әлтаев.
Еске сала кетсек, бүгін Мәжілістің жалпы отырысында Мемлекет басшысының ел тізгінін қолына алған алты жылдан бергі жүзеге асырып келе жатқан саяси реформалары туралы Мәжіліс Төрағасы Ерлан Қошанов баяндама жасап, артынша депутаттар талқыға салды.
Отырыс соңында Мәжіліс депутаттары еліміздің барлық прогрессивті қоғамдық-саяси күштерін Мемлекет басшысының төңірегінде топтасуға және Әділетті Қазақстан құру қағидаттарына негізделген резолюция (қарар) қабылдады.
723 рет оқылды
