Фото: Reuters / Sarah Meyssonnier
Жыл сайын «Алтын доп» төңірегінде пікірталас көп. Биыл жүлдені Винисиус Жуниор емес, Родриго Эрнандес алғанына таңданған жетерлік. Бірі жүлде лайықты ойыншыға бұйырмады десе, ендігісі Franсе Football-дың нағыз еңбекті елей бастағанын айтады. Расымен, Родри есімімен белгілі футболшының қандай жетістігі бар? Ол марапаттау салтанаты кезінде қандай мәлімдеме жасады?
Иә, көпшілік биыл «Алтын доп» Винисиус Джуниорға бұйыратынына кәміл сенді. Күні бұрын құттықтап, бөркін аспанға атқан жанкүйері де жетерлік. Алайда марапаттау салтанаты басталуға бірнеше сағат қалғанда Родридің жеңіске жеткені мәлім болды. Себебі Винисиус жүлде алмайтынын күні бұрын білген «Реал» ойыншылары жиынға қатысудан бас тартты. Ал «Реал Мадрид» жылдың үздік ерлер командасы номинациясында жеңіске жеткен-ді. Клубтың бас бапкері Карло Анчелотти де жылдың үздік бапкері атанды. Бірақ салтанатты кешке клубтың бірде бір өкілі қатысқан жоқ.
Дауыс беру нәтижесі бойынша, Родриго Эрнандес бірінші, Винисиус Джуниор екінші тұр. Одан кейін Джуд Беллингем мен Дани Карвахаль бар. «Жыл қақпашысы» атағы Эмилиано Мартинеске бұйыртса, Айтана Бонмати жылдың үздік әйел ойыншысы атанды. «Үздік жас ойыншы» - «Барселона» клубының жартылай қорғаушысы Ямин Ямал.
Сонымен, жыл ойыншысы атанған Родри – «Манчестер Сити» клубының, Испания ұлттық құрамасының жартылай қорғаушысы. Ол өткен маусымда «Манчестер Сити» клубымен Англия чемпионатында топ жарды. Биыл Испания құрамасымен бірге Еуропа чемпионы атанып, турнирдің үздік ойыншысы болды. Статистика бойынша, өткен маусымда 12 гол соғып, 14 нәтижелі пас берген. «Манчестер Сити» Родримен бірге 34 ойын қатарынан жеңілген жоқ. Тек жартылай қорғаушы алаңға шықпаған төрт кездесуде ұтылды. Ол клубтағы орны қандай болса, ұлттық құрамадағы салмағы да сондай ойыншы. Испания Еуропа чемпионатында 11 ойын қатарынан қарсыласын айқын жеңді. Оның аталған турнирде көрсеткен еңбегіне, атқарған «қара жұмысын» сарапшылар бас бармақпен бағалаған. Құрамдағы жас жігіттерге бас болып, команданың іргетасына айналды. Қызығы сол, 64 жылдан кейін испан футболының бағы жанып, түлегі «Алтын доп» алып жатыр. Бұдан бұрын Альфредо ди Стефано (1957,1959 ) мен Луис Суарес Мирамонтес (1960) аталған жүлдеге иелік етті.
Фото: ballondorofficial
Кішіпейіл Родриго
28 жастағы Родри әлеуметтік желіге тіркелмеген. Қарапайым өмір салтын ұстанатын футболшы. Бос уақытын отбасына, сүйікті ісіне арнағанды ұнататын адам. Кәсіби мансабын 2015 жылы «Вильярреал» клубында бастап, 2018 жылы «Атлетико Мадридке» ауысады. Аталған клуб сапында жүріп Еуропа Суперкубогын иеленеді. «Манчестер Сити» клубы оның еуроаренада көрсеткен ойынына тәнті болып, келісімшарт ұсынады. Осылайша, 2019 жылдан бастап әлемнің азулы клубтарының бірінде доп теуіп жүр. Әйгілі бапкер Гвардиола оның ойын мәнеріне, ойлау қабілетіне таңданатынын бірнеше рет айтқан. Сөйтіп, «Манчестер Сити» Родримен төрт рет қатарынан АПЛ-де топ жарды. 2023 жылы Чемпиондар лигасы финалында «Интер» қақпасына гол соғып, жанкүйер арманындағы трофейді Англияға алып келді. Сол жылы клубтың требл жасағаны тағы бар.
Иә, оның алаңдағы интеллектін жоғары бағалайтындар жетерлік. Қайта түлеген Испания құрамасының сенім артар ойыншысына айналғаны да содан. У-шудан алыс, білгенімнен білмегенім көп дейтін Родри білімін жалғастыруды ойлаған екен. Бірақ Англияға қоныс аударғаны, тығыз ойын кестесі қалауын орындауға кедергі жасаған. Ол – Кастилья университетінің түлегі. Тіпті жастар сапында жүргенде мансабын аяқтап, білім жолына бет бұрғысы келген. Сәтін салып, «Вильярреалдан» ұсыныс түсіп, кәсіби карьерасын бастады. Сүйіктісімен де университет қабырғасында танысқан. Қымбат көлік тізгіндеп, жарқ-жұрқ ететін жерде жүргенді ұнатпайды. Биыл қыркүйек айында «Арсеналға» қарсы ойында жарақат алып, маусымды ерте аяқтады. Сол үшін «Алтын доп» табыстау салтанатына таяққа сүйеніп келді. Келді де жүрек тебіренісін жеткізіп, жүлде туралы мәлімдеме жасады.
«Бұл жеңіс менікі емес, испан футболының мерейі тасыған күн. Бұрынырақта қаншама ойыншы «Алтын допқа» лайық болса да, қолы жеткен жоқ. Соның ішінде Иньеста, Хави, Икер Касильяс, Бускетс пен тағы басқасы бар. Марапатым жартылай қорғаушылар үшін де құнды. Бүгін достарым хабарласып, жүлде табыстарда футболдың салмағы басқанын, жартылай қорғаушы еңбегі бағаланғанын айтты. Сол үшін қуаныштымын. Осы марапат жолында мені демеген, қолдаған баршаға алғысым шексіз. Әлемнің ең үздік клубы «Манчестер Ситиге», Испания ұлттық құрамасына құрметім бөлек. Олар болмаса мұндай жүлде бұйырмас еді», - деді Родри марапаттау салтанатында.
Дайындаған: Айзат Айдарқызы
74039 рет оқылды
