Алматылық инфекционист дәрігер әлемде Кавасаки синдромының таралуына байланысты ата-аналарға балаларына бақылауды күшейту керектігін айтты, деп хабарлайды "Ұлт ақпарат".
Өңірлік коммуникациялар қызметі алаңындағы онлайн-сұхбат барысында Алматы қалалық балалар клиникалық инфекциялық ауруханасының дәрігер-сарапшысы, балалар жұқпалы аурулары кафедрасының меңгерушісі, медицина ғылымдарының докторы, профессор Ғалия Құттықожанова, ата-аналардан балалар арасындағы аурудың алдын алуға жауапкершілікпен қарауды сұрады.
«Ата-аналар балалармен көп жерлерде жүрмеуі керек, сыртқы байланыстарды азайтып, маска тағу керек. Көшеде тамақ ішпеу, гигиенаны сақтау, иммунитетті арттыру қажет. Асқынған жағдайда өзін – өзі емдеумен айналыспай, дәрігерлерге жүгіну керек», – деп ескертті Г. Құттықожанова.
Эпидемиологиялық тұрақсыздық кезеңінде санитарлық талаптарды елемеген жағдайда балаларда ауыр асқынулар болуы мүмкін.
«Сәуір айынан кейін жаңа синдром - Кавасаки пайда болды. Бұл синдром жиі кездеспейді, бірақ өте ауыр ауруларға жатады. Covid-19-бен байланысты болуына күдік бар. Кавасаки ауруы-бұл безгек, кем дегенде 5 күн болады. Сонымен қатар, келесі белгілер бар: көздің қызаруы, ауыз қуысының шырышты қабығының гиперемиясы, еріннің зақымдануы, бөртпе, мұрынның қабыршақтануы, аяқ - қол мен табанның ісінуі және гиперемиясы (қызаруы), мойын лимфа түйіндерінің ұлғаюы», - деді ол.
Сонымен қатар, ол балаларда Кавасаки белгілері толық байқалмауы мүмкін екенін атап өтті. Алайда, жүрек асқынуын болдырмау үшін оларды ажырату және емдеуді бастау қажет және антибиотиктерді жөнсіз пайдаланбау керек.
«Балаларға вирусқа қарсы препараттарды қолдану ұсынылмайды. Балаларға симптоматикалық ем қолдану көрсетіледі. Аурудың белгілері және вирустың ағзалардағы әрекеті нәтижесінде пайда болған процестер емделеді. Кавасаки синдромы пайда болған кезде топтың консилиумын жүргізу қажет. Оған инфекционистер, ревматологтар, кардилогтар және реаниматологтар кіруі тиіс», - деді Г.Құттықожанова.
Сонымен қатар, ол 1-2 сынып оқушыларына оқудың ерекшелігіне байланысты мектепке күндізгі бөлімде баруға рұқсат етілетінін атап өтті.
« Менің ойымша, 3-4 сынып оқушылары мұғалімдерін көрді, мектепте білмі алды. Сондықтан олар қашықтан оқи алады. Ал 1-2 сынып оқушылары сақтық шараларын сақтап, оқуы керек», - деп толықтырды дәрігер.
914 рет оқылды
