Фото: ҚР ЦДИАӨМ баспасөз қызметі
Алматыда өткен AlmatyFair.ai көрмесіне Қазақстан Республикасының Президенті Қасым-Жомарт Тоқаев пен Өзбекстан Республикасының Президенті Шавкат Мирзиёев қатысты, деп хабарлайды Ult.kz.
Қазақстан Республикасының Цифрлық даму, инновациялар және аэроғарыш өнеркәсібі министрі Жаслан Мәдиев көрме барысында alem.ai Халықаралық жасанды интеллект орталығын таныстырды. Бұл орталық жасанды интеллект саласында білім беріп, стартаптарды дамытуға арналған. Мұнда 9-11 сынып оқушыларына арналған Tomorrow School Junior білім беру орталығы және 01Edu System платформасына негізделген Tomorrow School өзара оқыту жүйесі жұмыс істейді. Сондай-ақ, жасанды интеллект кампусы, инкубациялық және акселерациялық бағдарламаларға арналған алаңдар, сондай-ақ халықаралық технологиялық компаниялардың ЖИ және зерттеу орталықтары ашылады.
"Alem.ai жасанды интеллект саласындағы зерттеулер мен стартаптар үшін негізгі платформаға айналады. Бұл орталық қазақстандық ЖИ шешімдерінің экспортын арттырып, Орталық Азияның зияткерлік орталығына айналуға ықпал етеді", – деді Жаслан Мәдиев.
Мемлекет басшыларына бағдарламалау дағдыларынсыз ЖИ-ассистенттер жасауға мүмкіндік беретін Ұлттық жасанды интеллект платформасы таныстырылды. Сондай-ақ, проактивті мемлекеттік қызметтер мен әлеуметтік әмиян арқылы ұсынылатын мемлекеттік қолдау шаралары көрсетілді.
Фото: ҚР ЦДИАӨМ баспасөз қызметі
ЖИ жобаларын жүзеге асыру үшін үлкен есептеу қуаты қажет. Осыған байланысты Қазақстанда 200 МВт қуаты бар екі ірі деректерді өңдеу орталығы (ДӨО) салынады. Президенттерге бұл орталықтардың Ақмола және Қарағанды облыстарында орналасатыны және Сингапурлық GK Hyperscale Ltd компаниясының қатысуымен жүзеге асатыны туралы айтылды.
Өзбекстанның IT Park бас директоры Абдулахат Қучкаров пен Astana Hub бас директоры Мағжан Мәдиев Central Asian Innovation Hubs – Орталық Азияның ең ірі технопарктер альянсын таныстырды. 2024 жылы екі елдің технопарктері осы бренд аясында бірігіп, инновацияларды жаһандық деңгейде ілгерілетуге және халықаралық технологиялық іс-шараларға қатысуға ниетті. AlmatyFair.ai көрмесінде тараптар Қазақстан мен Өзбекстанның IT компанияларын халықаралық нарыққа шығару туралы меморандумға қол қойды. 2025 жылы БАӘ мен Қытайда технологиялық хабтар ашу жоспарланып отыр.
Сондай-ақ, мемлекет басшыларына 1 миллион адамды ЖИ дағдыларына үйретуге бағытталған бағдарлама таныстырылды. AI People бастамасы аясында 2025 жылы Орталық Азияда 60 000 адамды оқыту көзделген. AI Kyzmet бастамасы аясында мемлекеттік қызметкерлер үшін ЖИ сертификаттау бағдарламасы іске асырылады, ал AI Corporate бастамасы корпоративтік секторда ЖИ құзыреттерін дамытуға бағытталған.
Көрмеде инновациялық ЖИ жобалар ұсынылды. Higgsfield OpenAI мен Anthropic аналогы болып табылатын іргелі ЖИ модельдерін әзірлеуде. Dereknet жер қойнауын цифрлық бейнелеуге арналған ЖИ технологияларын таныстырды. Taisan аккумулятор энергиясының тығыздығын арттыратын және өндіріс шығындарын төмендететін инновациялық материалдарды көрсетті. VR Uniblock жаңа буын сымсыз байланыс жүйесін ұсынды, ал Codiplay балаларға программалауды үйрететін ойын платформасын таныстырды.
Президенттер AlmatyFair.ai көрмесінің жоғары деңгейде ұйымдастырылғанын атап өтіп, Қазақстан мен Өзбекстандағы жасанды интеллект экожүйесін дамыту маңыздылығын ерекше бағалады.
457 рет оқылды
