Алматы облыстық Сыбайлас жемқорлыққа қарсы іс-қимыл департаменті екі адамға іздеу салып, фотосуреттерін жариялады. Олар қолға түскенде бірден қамауға алынады, деп хабарлайды ҚазАқпарат.
Іздестіріліп жатқандар жайлы ақпарат пен суретттері аталған департаменттің Instagram-дағы ресми парақшасына жарияланды.
33 жастағы Кудрат Розахунов - Алматы қаласының тұрғыны. Ол қолға түскен сәтте қамауға алынады.
Іздеу жарияланған екінші адам – Жангазы Байбеков. 54 жастағы азамат - Алматы облысы Ескелді ауданының тұрғыны. Ерекше белгілері, ернінің жоғары тұсында тыртық бар. Оны да сот санкциясымен бірден қамау бұйырылған.
Алайда, күдіктілерге нақты қандай айып тағылып отырғаны айтылмаған.
Департамент мәліметіне сәйкес, ақпарат бергендер жайлы мәлімет құпия түрінде қалады және оларға сыйақы қарастырылған.
«Егер осы суретте көрсетілген адамдарды танығандар болса, бірден Алматы облыстық сыбайлас жемқорлыққа қарсы іс-қимыл департаментіне хабар беруді сұраймыз. Біздің мекенжайымыз Талдықорған қаласы, Кабанбай батыра көшесі 36/42, телефон: 8 (7282) 24-70-13, 24-76-23 (кезекші бөлім үзіліссіз істейді), 8 775 212 19 91», - делінген ведомствоның хабарламасында.
1032 рет оқылды
