Ақтөбеде есірткі заттарын сақтап, сатумен айналысқан 7 күдіктіге қатысты тергеу жүріп жатыр. Оларға қатысты тағы да қосымша айып тағылды, деп хабарлайды ҚазАқпарат.
Ақтөбе облыстық ПД Есірткіге қарсы іс-қимыл басқармасының қызметкерлері ҚР Ұлттық Ұланның жасағымен бірлесіп, оңтүстік өңірлерінен Ақтөбе облысының аумағында аса ірі мөлшерде марихуана және гашиш тасымалдаумен, сақтаумен және өткізумен ұзақ уақыт бойы айналысқан 7 адамды ұстаған болатын.
Күдіктілерден 25 келі марихуана, 5 келіден астам гашиш тәркіленді.
«Бұған дейін есірткі заттарын сақтау, тасымалдау, сатумен айналысқаны үшін тергеу жүрді. Енді ҚР ҚК 262-бабының 1, 2-тармақтары негізінде есірткі құралдарының заңсыз айналымына байланысты қылмыстарды жасау мақсатында ұйымдасқан қылмыстық топ құру және оған қатысу бойынша қылмыстық құқық бұзушылықтар тіркеліп, тағы да қосымша айып тағылып жатыр», - деді облыстық ПД баспасөз қызметінің жетекшісі Ерболат Сарқұлов.
1002 рет оқылды
