30 қыр, 2020 сағат 19:00

АҚШ-тың MTV арнасында Димаштың қазақ тіліндегі бейнебаяны көрсетіледі

MTV USA арнасында Димаш Құдайбергеннің қазақ тілінде шырқаған әнінің бейнебаяны көрсетіледі. Осылайша Димаш – MTV арнасынан өз тілінде ән салған тұңғыш қазақстандық әнші атанғалы отыр. "Ұлт ақпарат" бұл туралы dimashnews.com сайтына сілтеме жасап хабарлайды.

Бейнебаянды MTV USA арнасының ресми YouTube желісі арқылы АҚШ-тан өзге кез-келген ел тамашалай алады.

«Менің тыңдармандарыма, әлемнің әр түпкіріндегі менің өнерімді бағалайтын жанкүйерлеріме шын жүрегіммен алғыс айтамын. Олар менің бала арманымның орындалуына себепкер болды. Қазақстан ғана емес, төрткүл дүниедегі Dears-тарымның қолдауына разымын. Құрметім мен алғысым шексіз», – деп Димаш өз лебізін білдірді.

Бейнебаян осы жұма күні Нью-Йорк уақытымен 17:00 мен 20:00 аралығында, ал Нұр-Сұлтан уақытымен түнгі 03:00 мен таңғы 06:00 аралығында жүктелетіні белгілі болып отыр. Бұл Америкада жұма күнгі прайм-тайм уақыт. Дәл осы уақытта MTV арнасын ең көп көрермен қарайды.