Фото: atameken.kz
«Атамекен» ұлттық кәсіпкерлер палатасының бұрынғы басшысы Абылай Мырзахметовтің ісі жабық режимде қаралады. Бұл туралы судья Айжан Күлбаева мәлім етті, деп хабарлайды Kazinform.kz агенттігі.
«Мемлекеттік айыптаушы қылмыстық істі жабық сот режимінде қарау жөнінде өтініш берді. Куәгер Г. прокурорға жеке басы мен отбасы мүшелерінің қауіпсіздігін уайымдайтынын айтып, істі жабық қарауды сұраған. Айыптаудың мән-жайын ескере отырып, куәгерлер мен оның отбасы мүшелерінің қауіпсіздігін қамтамасыз ету мақсатында сот мемлекеттік айыптаушының өтінішін қанағаттандыру және осы қылмыстық істі жабық сот отырысында қарау қажет деп санайды», — деді судья.
Бұған дейін хабарлағанымыздай, прокурор Бауыржан Шекенов сотты жабық өткізуді сұраған еді. Өтініште сотқа қатысатын жәбірленушілердің, куәгерлердің, олардың отбасы мүшелері мен жақын туыстарының қауіпсіздігін қамтамасыз ету қажеттігі айтылған.
Еске сала кетейік, «Атамекен» ұлттық кәсіпкерлер палатасының бұрынғы төрағасы Абылай Мырзахметов өткен жылы 10 мамырда ұсталған.
Антикор таратқан ақпаратқа сәйкес, ол алаяқтық және кәсіпкерді туысын қылмыстық жауапкершіліктен босатуға жәрдемдескені үшін аса ірі көлемде пара беруге итермеледі деген күдікке ілінген.
«Атамекен» ҰКП экс-басшысына қатысты іс былтыр 21 желтоқсанда сотқа жетті.
361 рет оқылды
