شىمكەنتتەگٸ ٸرٸ مەتاللۋرگييالىق Sin Yuan Steel زاۋىتىنىڭ اينالاسىندا حالىقارالىق جانجال ٶرشٸپ بارادى. قىتايلىق ينۆەستورلار مەن كەسٸپورىننىڭ ادۆوكاتتارى قۇقىق قورعاۋ ورگاندارى تاراپىنان بۇرىن-سوڭدى بولماعان قىسىم جاسالعانىن اشىق مەلٸمدەپ, كٷشتٸك قۇرىلىمداردىڭ ەرەكەتٸنەن كەلگەن جالپى شىعىندى 100 ميلليون دوللار دەپ باعالادى. قورعاۋشىلاردىڭ پٸكٸرٸنشە, زاۋىتتاعى تەكسەرۋ جەلەۋٸمەن بيزنەستٸ تۇرالاتۋ ەرەكەتٸ جاسالعان, دەپ حابارلايدى Ult.kz Informburo31-كە سٸلتەمە جاساپ.
قاقتىعىستىڭ شيەلەنٸسكەن كەزەڭٸ 6 مامىردا باستالدى. سول كٷنٸ ۇيىمداسقان قىلمىسقا قارسى كٷرەس باسقارماسىنىڭ (ۇققكب) قىزمەتكەرلەرٸ زاۋىت اۋماعىندا اۋقىمدى رەيد جٷرگٸزدٸ. بۇعان ادامداردى زاڭسىز ۇستاپ وتىر دەگەن انونيمدٸ حابارلاما سەبەپ بولعان. الايدا تەكسەرۋ بارىسىندا بۇل اقپارات تولىق راستالمادى.
قۇقىق بۇزۋشىلىقتار انىقتالماعانىنا قاراماستان, كٷشتٸك قۇرىلىمدار جاپپاي ۇستاۋ شارالارىن جٷرگٸزدٸ: ونداعان قىتاي ازاماتى, سونىڭ ٸشٸندە نەگٸزگٸ قىزمەتكەرلەر مەن ينۆەستورلار ارنايى قابىلداۋ ورنىنا جەتكٸزٸلٸپ, وندا 15 كٷن بويى قاماۋدا ۇستالدى.
پوليتسييا ەرەكەتتەرٸ ستراتەگييالىق كەسٸپورىننىڭ جۇمىسىن ٸس جٷزٸندە توقتاتىپ تاستادى. بالقىتۋ پەشتەرٸ مەن كٷردەلٸ ٶندٸرٸستٸك جابدىقتار مامانداردىڭ باقىلاۋىنسىز قالدى. ٸرٸ تەحنوگەندٸك اپاتتىڭ الدىن الۋ ٷشٸن قالعان قىزمەتكەرلەر جٷيەلەردٸ شۇعىل تٷردە ٶشٸرۋگە مەجبٷر بولدى. مەجبٷرلٸ توقتاپ قالۋ مەن كەلٸسٸمشارتتاردىڭ بۇزىلۋى سالدارىنان كەسٸپورىن وراسان زور شىعىنعا باتتى.
«بٸزگە 200 مىڭ دوللار كٶلەمٸندە تٸكەلەي, 500 مىڭ دوللار كٶلەمٸندە جاناما شىعىن كەلتٸرٸلدٸ. سونىمەن قاتار مەملەكەت سالىق تٷسٸمدەرٸن الا المادى. بۇل جەرگٸلٸكتٸ ەكونوميكاعا ايتارلىقتاي زييان كەلتٸردٸ», - دەدٸ كەسٸپورىننىڭ تەڭ قۇرىلتايشىسى كە سيۋيۋن.
ارنايى قاماۋ ورنىندا ۇستالعانداردىڭ اراسىندا قازاقستانعا ۆيزاسىز رەجيم ارقىلى كەلگەن ٸرٸ شەتەلدٸك سەرٸكتەستەردٸڭ بولۋى ەرەكشە رەزونانس تۋدىردى. كەسٸپكەرلەر شىمكەنت زاۋىتىنىڭ ٶندٸرٸستٸك قۋاتىن كەڭەيتۋگە شامامەن 30 ميلليون دوللار ينۆەستيتسييا سالۋدى جوسپارلاعان. الايدا كەلٸسسٶزدەردٸڭ ورنىنا قۇجاتتارىنان ايىرىلىپ, قاماۋعا الىنعان. كەسٸپكەرلەر مۇنداي وقيعالار قازاقستاننىڭ ينۆەستيتسييالىق بەدەلٸنە اۋىر سوققى بولاتىنىن ايتىپ وتىر.
زاۋىت قورعاۋشىلارى بۇل جاي عانا كەزەكتٸ تەكسەرۋ ەمەس ەكەنٸنە سەنٸمدٸ. كەسٸپورىن باسشىلىعى پوليتسييا قىزمەتكەرلەرٸنٸڭ لاۋازىمدىق ٶكٸلەتتٸكتەرٸن اسىرا پايدالانۋ فاكتٸسٸ بويىنشا تەرگەۋ جٷرگٸزۋدٸ تالاپ ەتٸپ, قر باس پروكۋراتۋراسىنا رەسمي ٶتٸنٸش جولداعان.
«بٸز بۇل ٸس بويىنشا تەرگەۋ جٷرگٸزٸلەدٸ دەپ كٷتەمٸز, ٶيتكەنٸ بۇل قاتارداعى وقيعا نەمەسە پروتسەسسۋالدىق قاتەلٸك ەمەس. بۇل – رەيدەرلٸك باسىپ الۋ بەلگٸلەرٸ بار ماقساتتى ەرەكەتتەر نەمەسە ونىڭ ارتىندا باسقا دا پايدانى كٶزدەگەن مٷددەلەر تۇر», – دەيدٸ زاۋىت ادۆوكاتى مارات بايزاكوۆ.
