© Sputnik / Ертай Сарбасов
Теміртауда мас жүргізуші полицейді 200 метрге сүйреп әкетті. Ер адам 7 жылға көлік жүргізу құқығынан айырылды, - деп хабарлайды Polisia.kz.
Оқиға 11 ақпан түнгі сағат 00.35 шамасында болған. Теміртау қалалық полиция басқармасы патрульдік полиция батальонының қызметкерлері Бейбітшілік даңғылының бойында автокөлікті тоқтатқан. 31 жастағы ер адамның жүргізуші куәлігі болмаған.
"Әңгіме барысында тәртіп сақшылары ішімдік иісін сезіп, жүргізушіден көліктен түсуін талап етеді. Алайда сол мезетте жүргізуші көліктің есігін жаппай, оқиға орнынан қашпақшы болған. Полицей көлік салонына мініп үлгерген, бірақ аяғы сыртта қалып қойған. Жүргізуші оны 200 метрге сүйреп әкетіп, тоқтаған", - делінген хабарламада.
Полиция қызметкерлері ер адамды наркология орталығына жеткізді. Ол орташа дәрежеде мас болғаны анықталды.
Жүргізушіге қатысты Әкімшілік құқықбұзушылық туралы кодекстің 608, 613 және 667-бабына сәйкес хаттамалар толтырылды.
Сот шешімімен 31 жастағы азамат құқық бұзғаны үшін 30 тәулікке әкімшілік қамауға алынып, 7 жылға жүргізуші құқығынан айырылды.
555 рет оқылды
