Фото: Pexels.com
Танымал блогер Бейбіт Әлібеков өзінің Lamborghini спорт көлігімен трюк жасамақ болған жігіт көз жұмғанын қайғыра жеткізді. Жас жігіт одан көлігін бере тұруды қиыла сұраған, ол онымен TikTok-тағы байқауға қатысу үшін видео түсірмек болыпты. Алайда трюк сәтсіз шыққан, деп хабарлайды Ult.kz.
Түсірілім Алматы облысы Іле ауданындағы "Сокол" автодромында өткен. Трюкті орындау кезінде Батырхан ауыр жарақат алып, кейіннен ауруханада жан тапсырған.
"...Айтарға сөзім жоқ. Туған-туыстарына, жақындарына қайғырып көңіл айтамын. Мүмкін, көлікті бермеуім керек пе еді...", - дейді Әлібеков.
Бұл ақпаратты Алматы облысы ПД баспасөз қызметі растап, қайғылы оқиға 29 қазанда Ақсай ауылындағы "Сокол" автодромының аумағында болғанын жеткізді.
"Оқиға орнында түсірілім жүргізілген. Трюкті орындау кезінде 22 жастағы жігіт көлік дөңгелегі астына түсіп, ауыр жарақаттар алды. Салдарынан зардап шеккен жігіт аудандық ауруханаға жеткізіліп, келесі күні - 30 қазанда есін жимастан көз жұмды. Lamborghini тізгінінде 45 жастағы ер адам болған. Аталған факті бойынша полиция қылмыстық іс қозғады. Тергеу шаралары жүргізіліп жатыр", - деді полициядан.
1500 рет оқылды
_140_110.webp)
