Екі адамның өмірін қиған Шарын шатқалындағы қайғылы жағдай бойынша екі қылмыстық іс қозғалды, деп хабарлайды "Ұлт ақпарат".
«Қазақстан Республикасы Қылмыстық кодексінің 306-бабы 3-бөлігі және ҚР ҚК 141-бабының 2-бөлігі бойынша сотқа дейінгі тергеу басталды. Өзге ақпараттар заңға сәйкес жарияланбайды», - деп мәлімдеді Алматы облыстық полиция департаментінің баспасөз қызметінен.
Яғни, тергеу қауіпсіздік талаптарына сай қызмет көрсетпегі үшін адам өліміне әкеп соққан жағдай бойынша және балалардың денсаулығы мен қауіпсіздігінің сақталмағандығына сәйкес жүріп жатыр.
Еске салайық, 29 мамыр күні Алматының №199 мектебінің 5-сыныбында оқитын 8 оқушы, 5 ата-ана және 3 мұғалім Шарын шатқалына саяхатқа шыққан.
Шатқалда кенет сел жүріп, 2 адам мерт болды, бір адам із-түзсіз жоғалып, тағы 6-ауы зардап шекті.
Кейіннен ҚР Білім және ғылым министрлігі аталған оқиға салдарынан 1 оқушы мен 1 мұғалімнің қаза тапқанын, тағы бір оқушыны іздеу жұмысы жүріп жатқанын мәлім етті.
Мерт болған ұстаз - 26 жастағы Мерей Ибрагимов көркемөнер пәндерінен сабақ берген. Еңбек өтілі – 5 жыл.
ҚР БҒМ Балалар құқығын қорғау комитетінің төрағасы Есенғазы Иманғалиев бұл саяхат мектеп әкімшілігімен келісілмегенін мәлім етті.
1056 рет оқылды
