Нұр-Сұлтан қаласы прокуратурасының ведомствоаралық жедел тергеу тобы Нұр-Сұлтан қаласы әкімінің бұрынғы орынбасары Қ.Т. Сұлтанбековке, «Астана LRT» ЖШС басқарма төрағасы болған Т.Н. Арданға және басқа да тұлғаларға қатысты «Астана қаласының жаңа көлік жүйесі» LRT, BRT/ITS жобасын іске асыруға бөлінген бюджет қаражатын жымқыру фактісі бойынша қылмыстық істі тергеп жатыр, деп хабарлайды ҚазАқпарат.

Құзырлы органның мәліметінше, тергеу барысында жиналған дәлелдемелер күдікті Қ.Т. Сұлтанбековтің әрекеттерін саралауға мүмкіндік туындаған. Яғни оған ҚР Қылмыстық кодексінің 1997 жылғы редакциясындағы (бұдан әрі - ҚК) 176-бабы (ұйымдасқан топ құрамындағы қызмет жағдайын пайдалана отырып, аса ірі мөлшерде бюджет қаражатын бірнеше рет ұрлау), 235-бабы (бірнеше қылмыс жасау мақсатында ұйымдасқан топ құру және оны басқару) және қолданыстағы ҚК-нің 189-бабы (ұйымдасқан топ құрамындағы қызмет жағдайын пайдалана отырып, аса ірі мөлшерде бюджет қаражатын бірнеше рет ұрлау) бойынша айып тағылмақ. Ал Т.Н. Арданның заңсыз әрекеттері 1997 жылғы Қылмыстық кодекстің 176-бабы (ұйымдасқан топ құрамында қызмет бабын пайдалана отырып, аса ірі мөлшерде бюджет қаражатын бірнеше рет ұрлау), 262-бабы (қызмет бабын пайдалана отырып, ұйымдасқан қылмыстық топқа қатысу) және 189-бабы (ұйымдасқан топ құрамында қызмет бабын пайдалана отырып, аса ірі мөлшерде бюджет қаражатын бірнеше рет ұрлау) бойынша сараланған. 

ҚР Қылмыстық іс жүргізу кодексінің (бұдан әрі-ҚІЖК) 206-бабының 1-бөлігіне сәйкес, күдіктінің іс-әрекетін саралау туралы қаулы шығарылған кезден бастап жиырма төрт сағаттан кешіктірілмей жарияланады. Күдікті немесе оның қорғаушысы келмеген жағдайда қаулы жиырма төрт сағат өткеннен кейін де жариялануы мүмкін. 

Күдікті делініп отырған Қ.Т. Сұлтанбеков пен Т.Н. Арданның Қазақстан Республикасы аумағынан нан тыс жерде болуына және келуден жалтаруына байланысты қала прокуратурасы ҚІЖК-нің 206-бабының 8-бөлігін басшылыққа ала отырып, прокурордың келісімімен оларға тағылатын айыпты бұқаралық ақпарат құралдарында жариялап отыр. Қаулыларды жариялауға және қажетті тергеу іс-әрекеттерін жүргізуге қатысу үшін күдікті Қ.Т. Сұлтанбеков пен Т.Н. Ардан Нұр-Сұлтан қаласы прокуратурасының Нұр-Сұлтан қаласы Қабанбай батыр даңғылындағы әкімшілік ғимаратына келуі қажет. Күдіктілер тергеу әрекеттеріне қатысу үшін қорғаушыны өз бетінше шақыруға не қылмыстық процесті жүргізетін органнан қорғаушы сұрауға құқылы (ҚР ҚІЖК-нің 68-бабы). Егер қорғаушыны күдіктілер немесе олардың заңды өкілдері, сондай-ақ олардың тапсырмалары бойынша басқа да адамдар шақырмаса, қорғаушының қатысуын қылмыстық процесті жүргізетін орган қамтамасыз етеді (ҚР ҚІЖК-нің 67-бабы).

Күдіктінің тергеуге белгіленген мерзімде келуіне кедергі келтіретін себептер болса, сондай-ақ, күдіктінің немесе олардың мүдделерін белгіленген тәртіппен қорғайтын адамдардың прокурордан немесе сотқа дейінгі іс жүргізуді жүзеге асыратын адамнан қорғаушының қатысуын қамтамасыз етуі туралы өтінішхатты мәлімдеу туралы ниеті болса, қылмыстық қудалау органын алдын ала хабардар етуі қажет. 

Бұған дейін күдіктілер Қ.Т.Сұлтанбеков пен Т.Н. Арданды Нұр-Сұлтан қаласының прокуратурасы жауап алу үшін биылғы 12 қаңтарғаа шақыртқан. Алайда олар белгіленген уақытта келмеген және келуге кедергі келтіретін себептер туралы хабарламаған.