Фото: © pkzsk.info
Петропавлда өрт кезінде отбасынан айырылған ер азамат үш адамды өлтірді деген күдікпен ұсталды, деп хабарлайды Sputnik Қазақстан.
Естеріңізге сала кетейік, қайғылы оқиға 25 қыркүйек күні кешке болған. Береке шағын ауданы Волочаевская 113 мекенжайындағы жеке тұрғын үйде өрт кезінде жас әйел мен екі жас бала көз жұмды.
Өрт сөндірушілер жанған үйдің кіреберісінен үш мәйіт тапқан: 2003 жылы туған әйел, 1 жастағы қыз бен 5 жастағы ұл.
"Оқиға орнын тексерген кезде пеш жағылмағаны анықталды. Өрт электр сымдарының тұйықталуынан болуы мүмкін. Өйткені үйдің төбесі өрттен көп зақымданған", - деді сол кезде СҚО ТЖ департаменті мемлекеттік өрт бақылау басқармасының бастығы, азаматтық қорғау подполковнигі Аслан Ахметжанов.
Өрт шыққанда әйел ұйықтап жатқан күйеуін оятқан.
"Ер адам әйеліне "мен терезені ашамын, орындарыңда болыңдар" деген. Ол терезені сындырып жатқанда, әйел балаларымен кіреберіс дәлізге шыққан. Бірақ өрттен құтқара алмаған. Тексеру кезінде балалардың денесі кіреберістегі есіктің жанынан, сәл алыста бір жарым-екі метр қашықтықта әйелдің денесі табылды", - деді сол кезде Аслан Ахметжанов.
Алайда бір айдан кейін отағасы кісі өлтірді деген күдікпен ұсталды.
"Бұл факт Қылмыстық кодексінің 292-бабының 3-бөлігі "Екі немесе одан да көп адамның абайсызда өліміне әкеп соққан өрт қауіпсіздігі талаптарын бұзу" бойынша тіркелген болатын. 21 қазанда қылмыстық іс ҚР Қылмыстық кодексінің 99 - бабының 2-бөлігі 1-тармағына "Екі және одан да көп адамды өлтіру" бойынша қайта тергеу басталды", - деп хабарлады облыстық полиция департаментінің баспасөз қызметі.
Сондай-ақ полиция осы факті бойынша Қылмыстық кодекстің 3-бөлігінің 99-бабы "Жас адамды өлтіру" бойынша қосымша қылмыстық істі тіркеді. Сараптамалар жасалып, тергеу жүріп жатыр. 25 жастағы күдікті ер адам қамауға алынды.
582 рет оқылды
_140_110.webp)
