2020 жылдың III тоқсанында елімізде қылмыс жасаған 57,2 мың адам анықталды. Бұл туралы ҚР ҰЭМ Статистика комитетінен мәлім етті, деп хабарлайды "Ұлт ақпарат".
«Республиканың құқық қорғау органдары қылмыс жасаған 57,2 мың адамды анықтап (2019 жылғы III тоқсанмен салыстырғанда 23,1 пайыз аз), 28,2 мың адам қылмыстық жауапкершілікке тартылды (4,1 пайыз көп). Қылмыс жасаған барлық анықталған адамдардың көпшілігі жұмыссыздар - 82,2 пайыз», - делінген комитет ақпаратында.
Ведомство мәліметінше, орташа алғанда Қазақстанда қылмыс жасаған әрбір жетінші адам мас күйінде, әр тоғызыншысы дерлік топ құрамында болған. Қылмыс жасаған адамдардың жалпы санынан 1367 адам немесе 2,4 пайызы - кәмелетке толмағандар. Бұл өткен жылдың сәйкес кезеңімен салыстырғанда 36,4 пайызға аз. Олардың ішінде төмендегі жас аралығында жасалған қылмыстар: 14-15 жас – 256 (2019 жылғы III тоқсанда - 460) адам немесе кәмелетке толмаған құқық бұзушылар санының 18,7 пайызы; 16-17 жас – 1111 (1688) адам немесе 81,3 пайызы.
1417 рет оқылды
