БҚО қылмыстық істер жөніндегі мамандандырылған ауданаралық сотында Ерлан Исламғалиевке үкім шықты, деп хабарлайды "Ұлт ақпарат".
Сот үкімімен Е.Исламғалиев ҚР ҚК 110-бабы 2-бөлігі, 2-тармағы, 1), 2), 4)-тармақшасы, 194-бабы 4-бөлігі 2)-тармақшасы, 261-бабы 2-бөлігі 4)-тармақшасы, 120-бабы 2-бөлігі 2)-тармақшасына сәйкес айыпты деп танылып, түпкілікті жаза ретінде 13 жылға бас бостандығынан айырылды.
Сотталушының жазасын қауіпсіздігі барынша жоғары қылмыстық-атқару жүйесі мекемесінде өтеу белгіленді.
Жәбірленушінің талапарызы ішінара қанағаттандырылып, 10 млн теңге моральдық, 541 530 теңге материалдық залал өндірілді.
Сот талқысында анықталғандай, Е.Исламғалиев өткен жылдың 28 қарашасында әйелі Ираида Исламғалиеваны кепілдікке алу үшін аңшы пышағын, сосын дүкеннен Ф-1 оқу гранатасын алған. Сосын Жәңгір хан көшесі, 13 мекенжайында орналасқан әйелінің нотариалдық кеңсесіне келіп, оны кепілдікке алған.
И.Есламғалиеваны босату жөнінде құқық қорғау органдары қызметкерлері жүргізген келіссөз бес сағаттай уақытқа созылды. Осы мерзімде Е.Исламғалиев өзіне шампан сусынын, шоколад, тапанша, ұшақ, инкассаторлық машина және 100 мың АҚШ долларын жеткізуді талап етті. Оның талаптарын орындау үшін шампан, шоколад және залалсыздандырылған тапанша берілді.
Содан кейін кеңсеге ешкімнің кіре алмайтынына көзі жеткен Е.Исламғалиев күш қолданып әрі өлтіремін деп қорқытып, әйелінің еркінен тыс онымен екі рет жыныстық қатынас жасаған.
Келіссөз нәтижесінде И.Есламғалиева босатылды.
Сонымен қатар Е.Исламғалиев 2017 жылы 1 қыркүйекте кезекті тұрмыстық кикілжің барысында қызғаныш салдарынан әйелінің кішкентай ұлын бөлмеге қамап, күш қолданған. Үш-төрт сағат бойы баланың көзіне ұялы телефон шамының жарығын түсіріп, әлсін-әлсін өшіріп-жағып, оның намысына және жүйкесіне тиетін сөздер айтқан.
Әйеліне күш қолданып, оның екі қолын жылу батареясына белбеуімен байлап тастап, аузына скотч жапсырған.
Келесі күні әжетханаға барғысы келген әйелінің шашынан сүйреп, тыныс органдарын көпшікпен басып, оған пәтерін беруін талап еткен. Бас тартқан жағдайда күш қолданатынын айтқан. Келісім алмағаннан кейін 2 сағат бойы жәбірленушінің көзіне ұялы телефон шамын түсіріп, қинаған.
1-4 қыркүйек аралығында Е.Исламғалиев әйелі мен оның кішкентай ұлын пәтерден шығармай, И.Исламғалиеваның өзіне тұрмысқа шыққанға дейін алған мүлкін иемдену мақсатында күш қолданып, қорлаған.
Ақыры 4 қыркүйек күні өзі мен ұлының өміріне қауіп төнгендіктен, Ираида нотариус кеңсесіне күйеуіне еріп келіп, оның атына құны 14 840 855 теңге тұратын 3 бөлмелі пәтерін рәсімдеген.
Содан кейін 2017 жылдың қазанынан 2018 жылдың қаңтарына дейін, сондай-ақ 2019 жылдың ақпанында әйелінің полицияға шағымдануынан қауіптенген Е.Исламғалиев оны үнемі ұрып-соққан.
Е.Исламғалиевтің кінәсі жәбірленушілердің, куәгерлердің айғақтарымен, сараптама қорытындысымен толық дәлелденді.
Сот үкімі заңды күшіне енген жоқ.
786 рет оқылды
