Prezident tapsyrmasy aiasynda Qazaqstan mektepterinde jasandy intellekt tehnologiialaryn engizý bastalady, dep habarlaidy ult.kz.
Bul týraly Úkimettegi brifingte Oqý-aǵartý ministri Juldyz Súleimenova málimdedi. Onyń aitýynsha, pilottyq joba úsh oqý jylyna eseptelgen jáne bilim berý júiesin tsifrlyq transformatsiialaýǵa arnalǵan keshendi jospardyń bir bóligi bolady.
Ministrdiń sózinshe, joba Memleket basshysynyń 12 mamyrda qol qoiǵan Jarlyǵy negizinde júzege asady. Baǵdarlama aiasynda mektep infraqurylymyn jańǵyrtý, muǵalimderdi daiarlaý jáne oqýshylardyń jeke derekterin qorǵaý baǵytynda jumystar júrgiziledi.
Pilottyq jobaǵa elimiz boiynsha 500 mektep qatysady. Onyń ishinde:
– 100 «Keleshek mektebi»;
– 150 aýyl jáne qala mektebi;
– 250 shaǵyn jinaqty mektep bar.
Ministrdiń aitýynsha, joba arqyly jasandy intellektini bilim berý júiesine engizip, aýyl men qala mektepteri arasyndaǵy bilim sapasyndaǵy aiyrmashylyqty azaitý kózdelip otyr.
Sondai-aq muǵalimderdiń tsifrlyq tehnologiialardy meńgerýine erekshe nazar aýdarylady. Qazirdiń ózinde 350 myń pedagog jasandy intellekt assistentterin oqý protsesinde qoldaný jáne tsifrlyq pedagogika boiynsha biliktilikti arttyrý kýrstarynan ótken.
Budan bólek, Qazaqstanda jasandy intellekt kómegimen oqýshylarǵa jeke baǵdarlanǵan oqytý júiesin engizý josparlanyp otyr.
Juldyz Súleimenova balalardyń jeke derekterin qorǵaý basty máselelerdiń biri ekenin aitty. Onyń sózinshe, bul baǵytta arnaiy qujat ázirlenip jatyr. Bolashaqta mektepterde, bilim bólimderinde jáne ministrlikte jeke derekterdiń qaýipsizdigine jaýapty mamandar taǵaiyndalady.
Ministrlik málimetinshe, keshendi jospar 2026-2029 jyldarǵa arnalǵan. Al pilottyq kezeń 2026-2027 oqý jyldaryn qamtidy.
Brifing barysynda jýrnalister mektepterde qaǵaz oqýlyqtardyń ornyna planshetter engizile me degen suraq qoidy. Ministr bul másele ázirge qarastyrylyp jatqanyn aitty.
