Foto: Ózbekstan prezidenti baspasóz qyzmeti
Tashkent oblysynda jańa halyqaralyq áýejaidyń qurylysy resmi túrde bastaldy. Bul týraly Ózbekstan prezidenti Shavkat Mirziioevtiń instagram paraqshasynda málimdedi, dep habarlaidy Ult.kz.
Jobanyń iske qosylýyna Ózbekstan prezidenti Shavkat Mirziioevtiń ózi qatysyp, nysannyń el kólik infraqurylymyn túbegeili jańartatynyn aitty.
frank.uz dereginshe áýejai Tashkent oblysynyń ÝrtaChirchik jáne QýiyChirchik aýdandarynyń aýmaǵynda boi kóteredi. Qurylysqa arnalǵan jalpy jer kólemi 1 309 gektardan asady: onyń 790 gektary – ÝrtaChirchik aýdanynda, al 519 gektary – QýiyChirchik aýdanynda ornalasqan .
Jańa áýejaidyń birinshi kezeńi jylyna 20 million jolaýshyny qabyldaýǵa qaýqarly bolady. Sondai-aq jyl saiyn 129 myń tonna júk óńdeý josparlanyp otyr. Infraqurylymdyq qýat turǵysynan áýejai saǵatyna 30 ushý-qoný operatsiiasyn atqara alady. Bir mezgilde 62 ushaqqa deiin turaqtaýǵa múmkindik beretin perron salynady.
Áýejaiǵa aparatyn joldar Tashkent – Samarqand, Tashkent – Andijan jáne Tashkent – Bostanlyq baǵyttaryn biriktiretin bolady. Sonymen qatar jolaýshylar úshin joǵary jyldamdyqtaǵy temirjol stantsiiasy men shattl-avtobýstar júiesi qarastyrylǵan.
Jobanyń alǵashqy kezeńine shamamen 2,5 milliard dollar bólinedi. Qurylys jumystaryn halyqaralyq konsortsiým júzege asyrady. Onyń quramyna Vision Invest (Saýd Arabiiasy), Sojitz (Japoniia) jáne Incheon International Airport Corporation (Ońtústik Koreia) kompaniialary engen.
Áýejai qurylysy «jasyl qurylys» qaǵidalaryna sai júrgiziledi. Bul baǵytta ekologiialyq standarttar kúsheitilip, energiia únemdeitin tehnologiialar engizilmek dep otyr Ózbekstan basylymdary.
Sonymen qatar terminal aýmaǵynda 14 teleskopiialyq trap, 46 myń sharshy metr duty-free aimaǵy, zamanaýi meteo jáne navigatsiialyq júieler ornatý josparlanǵan.
Jańa halyqaralyq áýejaidyń tolyq iske qosylýy 2030 jylǵa deiin josparlanyp otyr. Ázirge nysannyń alǵashqy qurylys kezeńi bastalyp, injenerlik daiyndyq jumystary júrgizilýde.
