QR Úkimet basshysy Asqar Mamin Halyqaralyq Elektr bailanysy odaǵynyń Bas hatshysy Chjao Hoýlin jáne Dúniejúzilik poshta odaǵynyń Bas direktory Bishar A.Hýsseindi jáne bailanys salasyndaǵy aimaqtyq dostastyq ákimshiligi delegatsiiasyn qabyldady.
Jiyn aiasynda Bailanys salasyndaǵy aimaqtyq dostastyq ákimshiligi basshylary Keńesiniń 55-shi otyrysy jáne TMD-ǵa múshe memleketterdiń aqparattandyrý jónindegi Úilestirý keńesiniń 25-shi otyrysy sóz boldy. Sondai-aq qazan aiynda Egipette ótetin Búkilálemdik radio bailanysy konferentsiiasynyń jumystary jaiyn talqylady.
Kezdesý barysynda Úkimet basshysy qazirgi tańda elimizde aqparattandyrý jáne tsifrlandyrý jónindegi jobalarǵa, 5G jelisi men keń jolaqty internetke qoljetimdilikti arttyrýǵa, otandyq ekonomikanyń damýy men básekege qabilettiligin kúsheitýge basa nazar aýdarylyp otyrǵandyǵyn tilge tiek etti.
«2023 jyldyń sońyna deiin «Tsifrlyq Qazaqstan» memlekettik baǵdarlamasy negizinde respýblikanyń barlyq aýyldyq eldimekenderin keń jolaqty internetpen qamtý jáne joǵary tehnologiialyq bailanys túrlerin qoldanysqa engizý josparlanyp otyr», - deidi QR Premer-ministri.
Sonymen qatar Asqar Mamin kórshiles Resei, Qytai jáne Ortalyq Aziia elderine telekommýnikatsiialyq trafikti qamtamasyz etetin transporttyq infraqurylym qurý jospary týraly da aityp ótti.
Premer-Ministrdiń aitýynsha, qazirgi ýaqytta elimizde Kaspii teńizi arqyly Ázerbaijanmen keń jolaqty internet ornatý úshin daiyndyq jumystary júrip jatyr. Bul protsess 2021 jyldyń sońyna deiin aiaqtalady dep josparlanǵan.
Sonymen birge Asqar Mamin aimaqtyq dostastyq ákimshiligi delegatsiiasy múshelerin 2020 jyldyń aqpan aiynda Almatyda ótetin «Jahandaný dáýirindegi tsifrlyq kún tártibi 2.0» IV forýmyna qatysýǵa shaqyrdy.
Aita ketsek, QR Prezidenti Q.Toqaev Halyqaralyq elektr bailanysy odaǵynyń Bas hatshysy Chjao Hoýlindi qabyldap, infokommýnikatsiialyq tehnologiia salasyndaǵy birlesken jumystar jóninde talqylady.
