Aqtaý áýejaiynda denesine esirtki kapsýlalaryn jasyryp ótkizbek bolǵan sheteldik azamat ustaldy, dep habarlaidy ult.kz.
Qazaqstan Respýblikasynyń Ulttyq qaýipsizdik komiteti baspasóz qyzmetiniń málimetinshe, kúdikti jalpy salmaǵy shamamen 1 keli bolatyn 114 apiyn kapsýlasyn jutyp, Qazaqstan aýmaǵyna alyp ótpek bolǵan.
UQK esirtki quraldarynyń zańsyz ainalymyna qarsy kúres jalǵasyp jatqanyn atap ótti. Biyl sáýir aiynan beri esirtki jetkizýdiń 9 halyqaralyq jáne 2 óńirlik arnasy joiylyp, bir fitozerthananyń qyzmeti toqtatylǵan.
Sonymen qatar, Astana áýejaiynda Ońtústik Aziia elderiniń birinen 12 keli gashish maiyn jetkizgen qazaqstandyq ustalǵan.
Budan bólek, «kóknár sabanyn» kontrabandalyq jolmen tasymaldap, odan esirtki óndirdi degen kúdikke ilingen uiymdasqan qylmystyq toptyń áreketi toqtatyldy.
Arnaiy operatsiialar barysynda 3,4 keli apiyn, 9 keli gashish, 11,4 keli sintetikalyq esirtki, 18,5 keli gashish maiy, 26,4 keli marihýana, 110 gramm kokain, 20 tonna kóknár sabany jáne 150 litrden astam prekýrsor tárkilengen.
Atalǵan faktiler boiynsha 23 qazaqstandyq pen 3 sheteldik azamat ustalyp, sotqa deiingi tergep-tekserý bastaldy.
