Бүгінде ҚР Денсаулық сақтау министрлігі ай сайын xалық жиі тұтынатын тауарларды сатып алып, арнайы зертxаналарда тексеріп отырады.
Жыл басынан бері 38 мыңнан астам өнімнің сапасы жан-жақты зерделенді, деп хабарлайды ҚазАқпарат тілшісі.
"Тамақ өнімдерінің 7,3 пайызы талапқа сай емес болып шықты. Соның басым бөлігі - шетелден келетін тауарлар. Жалпы, 172 мың тоннадан астам тауарлар утилизацияға жіберілді. Себебі xалық денсаулығына зиянды. Аталған тауарлардың ішінде балаларға арналған өнімдер де аз емес. Осы орайда ойыншықтардың 36,6 пайызы балалар үшін зиянды екенін ерекше атап өткен жөн. Ондай ойыншықтардың құрамында улы заттар, я болмаса, жарақат салу қаупі бар. Ондай ойыншықтардың басым бөлігі Қытай мен Түркиядан жеткізіледі", - деді Е.Біртанов Үкіметтің бүгінгі отырысында.
Министрдің айтуынша, тексерістер кезінде сырттан тауар тасып жүрген 50 кәсіпкер анықталған. Олар 52 мыңнан астам тауар түрін алып келген. Соның ішінде жеңіл өнеркәсіп тауарлары, ойыншықтар мен тамақ өнімдері бар. "Жалпы, тексерістердің нәтижесі бойынша 107 сот шешімі шығарылды. 20 миллион теңгеге айыппұлдар салынды", - деп атап көрсетті министр.
2131 рет оқылды
