Жанат Самат Қазақстандағы кәдеге жарату төлеміне жауапты "Жасыл Даму" АҚ басшысы болып тағайындалды, - деп хабарлайды "Ұлт ақпарат" министрліктің баспасөз қызметіне сілтеме жасап.
"ҚР Экология, геология және табиғи ресурстар министрі С.Брекешевтің бұйрығымен «Жасыл даму» АҚ басқарма төрағасы болып Жанат Самат тағайындалды", - делінген хабарламада.
Айта кетейік, бұған дейін Президент тапсырмасымен утиль алымын жинайтын жекеменшік "Оператор РОП" компаниясының қызметі тоқтатылды. Оны мемлекеттік оператор – "Жасыл даму" компаниясы алмастырды.
Қазір құзырлы органдар "Оператор РОП" компаниясына қатысты тексеріс жүргізіп жатыр. Бұрынғы оператордың функцияларын мемлекеттік компанияға беру процесі әлі аяқталған жоқ. Осыған байланысты "Жасыл даму" утилизациялық алым жинауды уақытша тоқтатты.
Жанат Самат 1980 жылы Ақтау қаласында дүниеге келген. 2001 жылы Есенов атындағы Ақтау университетін бітірген.
Еңбек жолын 2001 жылы Маңғыстау облысы бойынша Салық комитетінің ірі салық төлеушілерді талдау және мониторинг бөлімінің бас салық инспекторы ретінде бастады. Әр жылдары өңірдің салық комитетінде келіспеушіліктер мен консультация бөлімінің, жеке тұлғалар аудиті бөлімінің, жер қойнауын пайдаланушылар аудиті бөлімінің бас салық инспекторы болып жұмыс істеді.
2008 жылы Маңғыстау облысының кәсіпкерлік және өнеркәсіп басқармасы бастығының орынбасары болып тағайындалды, содан кейін "Каспий "ӘКК "ҰК" АҚ басқарма төрағасының орынбасары лауазымына тағайындалды.
2014 жылдан 2016 жылға дейін Қызылорда қаласында "Байқоңыр" әлеуметтік-кәсіпкерлік корпорациясы" ҰК" АҚ басқарма төрағасы болып жұмыс істеді. 2019 жылдан бастап Қазақстан Республикасы Экология, геология және табиғи ресурстар министрінің кеңесшісі болды.
2020 жылдан бастап Қазақстан Республикасы Экология, Геология және табиғи ресурстар министрлігі жанындағы "Қоршаған ортаны қорғаудың ақпараттық-талдау орталығы" ШЖҚ РМК бас директоры болып жұмыс істеді.
Тұрмыста, үш бала тәрбиелеп отыр. Ол - экономика ғылымдарының кандидаты.
908 рет оқылды
_80_80.jpg)
