Санжар Асфендияров атындағы Қазақ ұлттық медицина университеті жұқпалы және тропикалық аурулар кафедрасының ассистенті Ләззат Өмешова коронавирусқа қарсы вакцинацияның маңызы туралы айтты, деп хабарлайды ҚазАқпарат.
Оның айтуыша, COVID-19 - вирустық инфекция. Сондықтан вакцина коронавирус инфекциясына қарсы күресте жағдайды жақсартуға көмектеседі.
Сонымен қатар, Ләззат Өмешова әлемдегі эпидемиялық жағдайдың нашарлауы мен коронавирус инфекциясының жаңа штаммының таралуы аясында халықты КВИ-ге қарсы вакциналаудың маңызын атап өтті.
«Ұлыбританияда коронавирустың жаңа штаммы бар, ол агрессивті түрде өтуде. Біздің елдегі вирус осы деңгейге дейін мутацияға ұшырай ма, жоқ па деген сұраққа жауап беруге қиналамын, бірақ біздің республикамызға бұл штаммды Еуропадан өз азаматтарымыз әкелуі мүмкін, өйткені қазіргі коронавируспен де басында осындай жағдай болған», - деді ол.
Сонымен қатар, ол алдын алудың негізгі ережелерін сақтауды жалғастыру маңызды екенін тілге тиек етті.
Қазіргі уақытта негізгі алдын алу шаралары мынандай:
- маска режимі (дұрыс кию және ауыстыру режимін сақтау);
- қолды жиі жуу және дезинфекциялау арқылы жеке гигиенаны сақтау;
- 1,5 метрден кем емес қашықтықты сақтау;
- адам көп жиналатын жерлерден аулақ болу;
- COVID-19 расталған адамдарды оқшаулау.
Сарапшының сөзіне сенсек, халықты тұмауға қарсы вакцинациялау шешімі айтарлықтай нәтиже берді.
«Тұмау - ауыр респираторлық вирустық инфекция, ол интоксикацияның айқын белгілерімен жүреді, ал соңғы жылдары пандемиялық тұмау жағдайлары тіркелді. Бұл да ауыр вирустық пневмонияны туғызады. Менің ойымша, мемлекеттің тұмауға қарсы вакцинацияға көп қаражат бөлгені дұрыс болды. Егер адамдар тұмаумен қоса коронавируспен де ауырса, не болар еді?! Елестетіп көріңізші», - деді Ләззат Өмешова.
Еске салайық, Алматы қаласының әкімі Бақытжан Сағынтаевтың тапсырмасы бойынша тұмау вирусы таралуының алдын алу үшін жергілікті бюджеттен тәуекел тобындағы адамдарды тегін вакциналау үшін «Гриппол Плюс» вакцинасының 430 000 дозасы сатып алынған болатын.
941 рет оқылды
_80_80.jpg)
