Фото: «Алатау» театрының баспасөз қызметі
«Алатау» дәстүрлі өнер театрында «Үшқоңыр» тобының «Ұлы елім» атты шығармашылық кеші өтті, деп хабарлайды Ult.kz.
«Үшқоңыр» триосы алғаш Қаскелең аудандық мәдениет үйінің жанынан құрылған «Үшқоңыр» фольклорлы-этнографиялық ән-күй ансамблінің әншілерінен құралған болатын. Айсәуле Қайырғазина, Нариман Абдрахманов, Ерғали Ағайдаров осы өнер ұжымының алғашқы негізін қалаған өнерпаздары.
Топтың негізгі ұстанымы – халық әндері мен халық композиторлары және кейінгі композиторлардың әндерін қаймағын бұзбай, саф қалпында тыңдарманға ұсыну.
Бізге жеткен халқымыздың ән мұрасы өзінің ерекше иірімдерімен жан дүниемізді баурап алады. Әсіресе, біздің қазақтың әнге деген құштарлығы, әнге етене жақындығы тіпті ала-бөтен ғой. Солай болатын жөні де бар. Өйткені қазақ әнмен егіз жаратылған.
Фото: «Алатау» театрының баспасөз қызметі
«Үшқоңыр» триосының репертуары да кең ауқымды қамтыған. Ғасырлардан тамыр тартқан, ұлттың болмысын айқындайтын халық әндері мен халық композиторлары Ақан сері, Біржан сал, Мұхит, Үкілі Ыбрай сынды дәстүрлі ән өнерінің негізі болған Арқа, Жетісу, Батыс мектебін қамтиды. Сонымен қоса ХХ ғасырдың екінші жартысында қазақ ән өнерін жаңаша түрлендірген әндер «Үшқоңырдың» орындауында керемет нақышқа ие болып, тыңдарманның жүрегіне жол тауып келеді. Нұрғиса Тілендиев, Теміржан Базарбаев, Шәмші Қалдаяқов, Әсет Бейсеуов, Мансұр Сағатов сынды теңдесіз композиторлардың шығармалары топтың негізгі репертуарында.
Дәуір өтіп уақыт озған сайын, біз болашаққа көш түзеген қазақ ән керуенімен бірге сапар шегіп келеміз. Бұл күнде «Алатау» дәстүрлі өнер театрында көрермендеріне қалтықсыз қызмет етіп жүрген Нариман, Айсәуле, Ерғали да ән айтып қоймай өздерінің актерлік қырларымен де танылып келеді. Дарынды ұл-қыздарыңыз театр сахнасында өзіндік орны мен қолтаңбасы бар артистер болып қалыптасты.
Шәкірттерін құттықтап Қазақстанның Халық әртісі Рамазан Стамғазы, Қазақстанның еңбек сіңірген қайраткерлері Еркін Шүкіман мен Айгүл Қосановалар келіп, өздерінің жүрекжарды тілектерін айтып, әнмен шашу шашты.
Фото: «Алатау» театрының баспасөз қызметі
Халқын әсем әнмен сусындатқан дүл-дүл әншілер ән керуенінің сәнді салтанаты. Орындаушысын тапқан ән тыңдаушының жүрегіне жетері анық. Ал әнді нақышына келтіре білген әнші қашанда халқының ыстық ықыласы мен құрмет-қошеметіне бөленген. «Үшқоңыр» триосының шығармашылық кеші тыңдарманның көңілінен шыққан ерекше кеш болды.
Ардақ Оразғалиұлы
1287 рет оқылды
