Қазақстан Ұлттық банкі кадр резервіне үміткерлерді іріктеу басталғанын мәлім етті, деп хабарлайды ҚазАқпарат.
Қатысу үшін 2022 жылғы 5 қаңтар – 2022 жылғы 5 ақпан аралығында Қазақстан Ұлттық банкінің сайтында электрондық резюме толтыру қажет.
Кандидаттарды іріктеу кезіндегі негізгі өлшемшарттар: білімі, жоғары біліктілік деңгейі, жұмыс тәжірибесі, халықаралық сертификаттардың болуы (қаржы, IT саласында).
Кадр резервіне іріктеу кезең-кезеңімен жүргізіледі.
Бірінші кезең – түйіндеме мен мотивациялық хат (эссе) жолдау, одан кейін оларды қарау қорытындысы бойынша кандидаттарды Ұлттық банктің адам капиталын дамыту департаментінің өкілдері, сондай-ақ мүдделі бөлімше басшылары әңгімелесуге шақырады.
Іріктеуден өткен және кадр резервіне алынған ізденушілер жыл ішінде Қазақстан Ұлттық банкіне жұмысқа орналасуы мүмкін.
Кадр резервіне алынған кандидаттар тізімі қаржы реттеушісінің сайтында жарияланады.
