17 жастағы қызын бірнеше рет зорлаған Ақмола тұрғыны 16 жылға сотталды, – деп хабарлайды Polisia.kz.
Ақмола облысының қылмыстық істер жөніндегі мамандандырылған ауданаралық соты өз қызын бірнеше рет зорлады деп айыпталған Көкшетаудың 43 жастағы тұрғынына қатысты үкім шығарды.
"Қылмыс жасаған кезде қыз 17 жаста болған. Әкесі жасөспірімді алғаш рет 2020 жылдың тамызында қорлаған: туыстарынан қайтып келе жатып, ер адам көлік салонында өзінің арам ойын іске асырған. Қорыққан қыз бұл оқиға туралы анасына айтпаған. Ұялған. Ал жазасыз қалған әкесі кейіннен өзінің сұмдық әрекеттерін тағы екі рет қайталаған. Үш айдан кейін, қараша айында қыз анасына оқиға туралы айтқан, ал ол полицияға хабарлаған.
Тергеушілер дереу ҚР ҚК-нің 120-бабы 3-бөлігі (Зорлау) бойынша сотқа дейінгі іс қозғады. Тергеу аясында құқық қорғау органдары жәбірленуші мен күдіктінің айғақтарын мұқият зерттеп, тексерді. Сот-медициналық және сот-психологиялық-психиатриялық сараптамалар жүргізді, оқиға орнында қыздың айғақтарын тексеру және нақтылау жүргізілді" - делінген хабарламада.
Бұл ретте сот отырысы барысында сотталушы өз кінәсін жартылай мойындаған, алайда тергеушілер жинаған айғақтар оның сұмдық қылмыс жасағанын толық дәлелдеді. Сот оның қылмыстық жауаптылығы мен жазасын жеңілдететін мән-жайларды қарастырған жоқ.
Осылайша, сот үкімімен ақмолалыққа 16 жыл мерзімге бас бостандығынан айыру түріндегі жаза тағайындалды. Өмір бойы педагогикалық лауазымдар және кәмелетке толмағандармен жұмыс істеумен байланысты қызметтерді атқаруға тыйым салынды. Сондай-ақ қыздың пайдасына 3 млн теңге көлемінде моральдық зиян өтемақысын өндіріп алу туралы шешім қабылданды.
Қазіргі уақытта ер адам бас бостандығынан айыру орындарында жазасын өтеп жатыр.
990 рет оқылды
