24 қар, 2020 сағат 04:15

Таулы Қарабақта әзербайжан сарбазы мерт болып, тағы бірнеше адам жараланды

23 қарашада Таулы Қарабақта мина жарылып, Әзербайжан әскерінің офицері қаза болды. Мойындалмаған Таулы Қарабақ республикасының төрт тұрғыны мен бір ресейлік сарбаз жараланған. 

Ақпарат бойынша, Ресейдің бітімгер сарбаздары, Әзербайжан әскерилері мен мойындалмаған Таулы Қарабақ республикасының төтенше жағдай министрлігі және халықаралық Қызыл Крест ұйымының өкілдері Тертер ауданында қақтығыста қаза болғандарды іздестіру жұмыстарын жүргізген. Мадагиз ауылына келгенде әскерилер минаны басып кетіп, жарылған. Ресей қорғаныс министрлігі орыс офицерінің өміріне қауіп жоқ деп мәлімдеді. 

Ресей қорғаныс министрлігі өкілінің сөзіне сүйенген мемлекеттік ТАСС агенттігінің жазуынша, қақтығыс кезінде қаза болғандардың мәйітін табу және тапсырумен айналысып жатқан топтың жұмысты бастағандарына бір аптадан асқан. Табылған мәйіттер тараптарға жерлеуге беріледі.