02 жел, 2021 сағат 12:56

Шымкентте сирек ауруға шалдыққан әйел дүниеге дені сау сәби әкелді


Шымкент қаласында сирек кездесетін ауруға шалдыққан әйел дені сау баланы дүниеге әкелді.

29 жастағы Заретта Құрманғұжынова перзентханадан тұңғышымен бірге шықты. Туғанынан екі қолының саусақтары дұрыс бітпей қалған әйелге "жетілмеген остеогенез" диагнозы да қойылған. Соған қарамастан, ол дені сау нәресте босанды, деп хабарлайды Sputnik Қазақстан агенттігі Otyrar.kz порталына сілтеме жасап.

"Дәрігерлерге үлкен рахмет айтамын. Мен ұлыма жақсы тәрбие беру үшін барымды саламын. Бәрін істей аламын деп ойлаймын. Ұлыма мұсылманның атын беріп, Даниал деп қойдық", - дейді Заретта.

Айта кетері, генетиканың бұзылуы салдарынан адам "жетілмеген остеогенез" ауруына шалдығады. Ондайда сүйектер жиі сынады. Оған шалдыққан адамның көбісі бала кезінен бастап өздігімен жүре алмайды. Мүгедек арбасын қолдануға мәжбүр болады.

Ресми мәліметке сәйкес, Қазақстанда, шамамен, 70 бала "жетілмеген остеогенез" ауруына шалдыққан.