Фото: Беларусь Президентінің ресми сайтынан
Қазақстандық жас орындаушы Шерхан Арыстан «Витебскідегі Славян базары» халықаралық өнер фестивалі аясында өтіп жатқан «Витебск» XXI халықаралық балалар музыкалық байқауының Гран-приін жеңіп алды, деп хабарлайды "Ұлт ақпарат" Мәдениет және спорт министрлігінің баспасөз қызметіне сілтеме жасап.
Қазылар алқасы 12 жастағы Шерханға конкурстың 2 күнінде де жоғары баға (70 балл) берді. Осылайша, отандасымыз жалпы саны 140 балл жинап, ең жоғары нәтижеге қол жеткізді.
Екінші орынды жергілікті жас өнерпаз София Рустамова (136 ұпай) алса, үшінші орынды армениялық Анаит Галстян (133 ұпай) иеленді. Конкурсқа 8-14 жас аралығындағы барлығы 18 елдің жас орындаушылары қатысты.
Байқаудың алғашқы күнінде Шерхан Андреа Бочелли, Дэвид Фостер және Эми Фостердің "Ama, Credi e vai" ("Сүй, сен және қадам жаса") композициясын орындады.
Айта кетейік, Алматы облысының тумасы осыған дейін де бірнеше халықаралық байқаудың лауреаты атанған.
"Халықаралық фестиваль осымен аяқталған жоқ. «Витебскідегі Славян базары» аясында эстрадалық ән орындаушылар байқауында еліміздің намысын Құралай Мейрамбек қорғайды.
Ересектер байқауына әлемнің 30 елінен үміткер қатысады. Қазақстандық орындаушылар бұған дейін аталған байқаудың бірнеше мәрте жеңімпазы атанған. Димаш Құдайберген (2015 ж.) мен Рухия Байдүкенова (2021 ж.) Гран-при жеңіп алса, әр жылдары Маржан Арапбаева, Әлішер Кәрімов, Мархаба Сәби және басқа да отандық өнерпаздар жоғары марапатқа қол жеткізген еді" - делінген министрлік хабарламасында.
1419 рет оқылды
