Сенатор Еділ Мамытбеков «Самұрық-Қазына» қоры туралы заңды қайта қарау немесе тіпті оны ел экономикасының дамуын тежеуші ретінде жою қажет деп санайды, деп хабарлайды ҚазАқпарат.
Сенаттың жалпы отырысында депутат өз сауалында 600-ге жуық ұйымды қамтитын квазимемлекеттік секторды, әсіресе «Самұрық-Қазына» ұлттық әл-ауқат қорын түбегейлі реформалау жөніндегі Президент алға қойған міндеттерді іске асырудың маңызын атап өтті.
«Соңғы уақытта «Самұрық-Қазына» қорына қатысты шағымдар аз емес. Бұған себептер де жеткілікті - Холдингтің құрамына көптеген қуатты институттар кіреді, олардан қайтарымын күткенімізге көп болды. Ал ол жоқ! Құр әңгіме, түсініксіз жоспарлар, жобалар, бағдарламалар ғана бар. Қордың басты кемшілігі - оның көп миллиардтық мемлекеттік қаражатты бөлудегі және жұмсаудағы схемаларының көмескілігі мен шатасуы болып отыр», - деп атап өтті сенатор Үкімет басшысы Әлихан Смайыловтың атына жолдаған сауалында.
Сенатор сондай-ақ Үкімет алдына қорды жаңғырту жөніндегі қабылданатын үлгінің тиімділігіне қатысты бірқатар мәселелер қойды.
«Бәсекелестік ортаға қандай активтер беріледі? Ұлттық экономикалық қауіпсіздік мүдделері қалай ескерілетін болады? Барлығын бәсекелестік ортаға беру керек пе? Қорды жаңғыртудың қабылданатын үлгісінің тиімділігі қандай, мемлекеттің кәсіпкерлік қызметке қатысуын қысқарту мөлшері қандай? Бұл ретте біз стратегиялық маңызды объектілер мемлекеттің бақылауында қалуы тиіс және жекешелендіруге жатпауы керек деп есептейміз», - деді Еділ Мамытбеков.
«Үкімет жоғарыда аталған проблемалар мен міндеттер бойынша өзінің мемлекеттік ұстанымын қабылдап, әзірлеуі қажет деп санаймыз», - деді сенатор.
575 рет оқылды
_80_80.jpg)
