Ресейлік оппозициялық саясаткер Алексей Навальнвый 24 қыркүйек күні таңертең абақтыда 30 күндік әкімшілік қамауда отырып шыққан бетте ұсталды. Бұл туралы оппозиционердің серігі Леонид Волков Twitter-де хабарлады, деп жазады Азаттық.
Кейін ол Навальныйды "Даниловский" ішкі істер бөліміне апарғанын және үстінен "Адам денсаулығына зақым келтірген митинг өткізу тәртібін бұзу" бабы бойынша әкімшілік іс қозғап жатқанын жазды. Волковтың сөзінше, мұндай бап Ресейде "ешқашан қолданылмаған". Бұл бап бойынша 300 мың рубльге дейін айыппұл салу немесе 20 тәулік әкімшілік қамауға алу жазасы қарастырылған. Волковтың пікірінше, Навальныйдың үстінен "ойдан құралған жаңа қылмыстық іс қозғап жатыр".
Навальныйдың баспасөз хатшысы Кира Ярмыштың хабарлауынша, саясаткерге қарсы жаңа істі Мәскеудің Симоновский аудандық соты қарайды.
Тамыздың соңында сот Навальныйды 28 қаңтарда "сайлаушылар ереуілі" акциясына қатысқаны үшін 30 тәулік әкімшілік қамауға алған. Навальныйдың жақтастары оның ұсталып, қамалғанын 9 қыркүйекке жоспарланған зейнетақы реформасына қарсы акциялармен байланыстырады. Навальныйдың ұсталғанына қарамастан, жақтастары Ресейдің 83 қаласында акциялар ұйымдастырған.
11 қыркүйекте Росгвардия басшысы Виктор Золотов Алексей Навальныйдың Сыбайлас жемқорлықпен күрес қоры Росгвардия қызметкерлері мемлекеттік сатып алу кезінде заң бұзғаны туралы зерттеуін жариялаған соң Навальныйды дуэльге шақырған. Навальный қамауда отырғандықтан оған жауап бере алмаған. Сыбайлас жемқорлықпен күрес қоры зерттеуде келтірілген ақпараты үшін сотта жауап беруге дайын екенін мәлімдеген.
1938 рет оқылды
