Фото: ҚР ТЖМ
Ауа райының қолайсыздығына байланысты ТЖМ бөлімшелері күшейтілген режимде қызмет атқарып жатыр, деп хабарлайды Төтенше жағдайлар министрлігінің баспасөз қызметі.
Ведомство мәліметінше, үш тәулік ішінде ТЖМ күштері 1000-нан аса адамды, оның ішінде 86 баланы құтқарған. Сонымен қатар 583 өрт сөндіріліп, 263 авариялық-құтқару және іздестіру жұмыстары жүргізілген.
"Тек өткен тәуліктің ішінде ТЖМ құтқарушылары жергілікті атқарушы органдармен, полициямен, әскери қызметшілермен және жол қызметтерімен бірлесіп 887 адамды құтқарды.
Ауа-райының нашарлауына байланысты автокөліктің барлық түрі үшін республикалық және облыстық маңызы бар автожолдардағы қозғалысқа шектеу енгізілді.
Солтүстік Қазақстан облысында «Челябинск-Новосибирск» республикалық маңызы бар автожолында дизель отынының қатып қалуы салдарынан Тәжікстаннан Ресейге бара жатқан жолаушылар автобусы тоқтап қалды. 31 жолаушы жылыту пунктіне орналастырылды.
Жамбыл облысында «Алматы-Ташкент» автожолының учаскесінің жабылуына байланысты автокөліктер кептелісі орын алды. Тоқтап тұрған көлік құралдарынан 392 адам құтқарылды. Оның 221-і теміржол көлігімен жөнелтілді. Қалған жолаушылар екі жылыту пунктіне орналастырылды" - делінген хабарламада.
Сонымен қатар, Қордай ауданында қарға батып қалған автокөліктерден 165 адам құтқарылып, жылыту пункттеріне жеткізілген.
"Түркістан облысында ТЖД күштері бұрқасыннан 287 адамды құтқарды, олар үйлеріне, теміржол вокзалына жеткізілді немесе жылыту пункттеріне орналастырылды.
Алматы, Жамбыл, Түркістан, Павлодар облыстарында іздестіру-құтқару жұмыстары сәтті аяқталды. Құтқарушылар, полиция қызметкерлері мен жергілікті тұрғындардың құтқару топтары қолайсыз ауа-райында мал бағуға және мал іздеуге шыққан алты адамды тапты" - делінген хабарламада.
Ведомство мәліметінше, қыста төтенше жағдайларды болдырмау үшін, ең алдымен, ауа-райының өзгеруін, метеорологиялық ақпаратты, ауа-райының нашарлауы туралы арнайы хабарламаларды, жолдардың жабылуын, дауылды ескертулерді үнемі қадағалап отыру қажет.
"Аязды күндері пештерді қыздыру, жылытқыштарды пайдалану, электр жүйесін жүктеу және басқалар салдарынан өрт қаупі артады.
ТЖМ дауылды ескерту кезеңінде алыс сапарға шықпауға, алыс қашықтыққа жаяу жүруден бас тартуға кеңес береді. Өрттің алдын алу үшін жылыту жүйелерінің, электр жабдықтарының дұрыстығын қадағалаңыздар, пештерді қыздырмаңыздар және жоғары қуатты құрылғыларды бір уақытта қосу арқылы электр жүйесін шамадан тыс жүктемеңіздер" - дейді министрлік баспасөз қызметі өкілдері.
514 рет оқылды_140_110.jpeg)
